ANG Department of Health (DOH)-Central Visayas nikompirmar sa Huwebes sa hapon, Agusto 5, 2021, nga upat ka mga kaso sa Covid-19 nga dunay Delta variant (B.1.617.2) gitaho sa rehiyon.
Si Dr. Jaime Bernadas, DOH-Central Visayas director, niingon nga ang upat ka dugang mga kaso sa Delta variant gikan sa Sugbo.
Si Bernadas niingon nga ang samples niining upat nga gipadala ngadto sa University of the Philippines Philippine Genome Center (UP-PGC) alang sa genome sequencing kauban nga batch sa gikuha niadtong Hulyo 4 ngadto sa 10.
Si Bernadas wa mohatag og dugang impormasyon kalabot sa dugang upat ka mga kaso.
Matod hinuon niya nga ang Regional Epidemiology and Surveillance Unit sa DOH-Central Visayas nagpahibawo na sa hingtungdang local government units (LGUs).
Niadtong Hulyo 29, ang DOH nipahibawo nga sa samples nga gipadala ngadto sa UP-PGC, 32 ang nasuta nga Delta variants. Ang tanan pulos gikan sa Sugbo.
Ang labing daghan sa Dakbayan sa Lapu-Lapu nga dunay 19 samtang ang unom gikan sa Dakbayan sa Sugbo. Ang tulo gikan sa Dakbayan sa Mandaue samtang tagduha sa Samboan ug Cordova.
Matod sa DOH nga ang duha ka mga Delta nga kaso sa Cordova nangamatay.
Ang mga gigikanan sa Delta sa Dakbayan sa Lapu-Lapu naapil usab sa top 10 sa mga barangay nga dunay labing daghan og mga kaso sa Covid-19 sumala sa pahibawo ni Mayor Junard Chan sayo ning semanaha.
Ang bag-ong upat ka mga kaso naapil sa dugang 116 ka Delta variant nga mga kaso nga gipahibawo sa DOH sa Huwebes.
Matod sa DOH nga gawas sa upat nga gikan sa Central Visayas, dunay 83 nga gikan sa National Capital Region, tulo sa Calabarzon, duha sa Davao Region, ug tag usa sa Zamboanga Peninsula, Cagayan Valley ug Ilocos Region.
Kini nidugang nga ang usa sa nadugang nga kaso mao ang returning overseas Filipino (ROF), samtang ang 20 gisusi pa kon kini lokal ba nga mga kaso o ROF.(WBS, LMY)