SA nagpadayon nga vaccination rollout diin ubay-ubay na ang mga nabakunahan, morag sa dili madugay pinugsanay na gyud ang magpabakuna ug mohimo nag lakang ang kagamhaban aron mapugos o ma-pressure ang kadaghanan nga magpabakuna na. Labina kon magbaha na unya ang bakuna nga moabot dinhi sa nasud. Karon, dili makapugos ang kagamhanan sa uban nga magpabakuna gumikan kay minus pa ang bakuna.
Kon moabot ang panahon nga daghan na ang magpabakuna, himuon nang requirement sa gobiyerno ang vaccination aron
mahatagan og pribilihiyo o special treatement. Diha na unya motumaw ang diskriminasyon sa fully vaccinated o dili vaccinated. Gani sa pagkakaron, aduna may plano ang kagamhanan pinaagi ni Presidential Adviser on Entrepreneurship Joey Concepcion nga hatagan og iyang kaugalingong buses ang vaccinated individuals. Di pasakyon sa maong mga bus ang dili vaccinated.
Kon mahitabo ni sa sakyanan sa kamad-an o land transportation, posible nga sagupon kini sa airlines industry. Ning paagiha, mabahin-bahin na ang katawhan. Sama sa mga lugar alang sa smokers ug non-smoking area. Sa basura, malata ug dili malata. Safe ug unsafe. Gasolina o diesel. Puti ug de kolor. Gradwado ug undergraduate. Male or female o LGBT. Karon vaccinated o unvaccinated.
Basin moabot ang panahon nga dili na pasudlon sa mga resraurant, malls o mga opisina ang dili vaccinated. Kon imbitahan kita og special occassions sama sa birthday parties, kasal o bisan pista, ibutang na sa invitation letter nga “for vaccinated only.”
Ang kinabuhi natugob sa pagbahin-bahin ug segregation. Tingali atong matawag nga balaud sa kinaiyahan nga anaa kanang pag-bahin-bahin o segregation. Samtang daghan ang nag-ingon nga kining segregation maoy dakong hinungdan sa kasamok sa kalibutan. Tawhay kaayo unta ang atong kinabuhi kon anaa ang panaghiusa ug wala ang pagkabahin-bahin. Apan tingali angay kitang mohinuktok sa pag-ayo kon wala ba nato kinahanglana ang pagbahin-bahin o paglain-lain kon maghisgot na kitag panglawas o mga sakit nga makamatay sama aning sa Covid 19? (bobbygnalzaro@gmail.com)