Barrita: Pagsaka sa Covid-19 cases ug CCMC

HAYAN nga ang pagsaka sa mga kaso sa Covid-19 sa Siyudad sa Sugbo maoy makapahuman sa bag-ong 10-story building sa Cebu City Medical Center (CCMC) kansang balor nisaka gikan sa P1.5 bilyones ngadto sa P2.8 bilyones.

Usa sa mga lakang nga gilusad ni Cebu City Acting Mayor Michael Rama sa pagtubag sa pagsaka sa mga kaso sa Covid-19 mao ang pagmando niadtong Agusto 4, nga tiwason ug himuong operational ang unang tulo ka andana sa CCMC inig ka Agusto 9.

Giwarningan ni Rama ang contractor nga kon di mahimong operational ang unang tulo ka andana sa Agusto 9, karong Lunes puhon, tapuson niya ang ilang kontrata tali sa Kagamhanan sa Siyudad sa Sugbo. Goodbye, my teacher, goodbye ang maong contractor.

Aron mahuman gyud ang bag-ong CCMC, kinahanglang si Rama pa maoy acting mayor. Kay sigun sa ulahing taho ni Cebu City Administrator Floro Casas Jr., nakagawas na sa hospital si Cebu City Mayor Edgardo Labella ug hayan mobalik na og report sa trabaho.

Gusto ni Rama nga ang temporaryo nga CCMC building sa Bureau of Fire Protection compound gamiton alang sa mga pasyente nga gitakbuyan sa Covid-19 ug gamiton ang bag-ong CCMC building sa ubang mga pasyente.

Samtang iyang ibalhin sa usa ka hotel ang mga medical frontliners nga nag-estar sa dormitoryo tupad sa Cebu City Quarantine Center (CCQC). Ang dormitoryo himuong isolation facility sa mga Covid-19 patients nga adunay mild to moderate symptoms.

Ang Cebu City nakatala og 210 ka mga bag-ong kaso sa Covid-19 sa Agusto 3, gisundan sa Cebu Province nga may 205, Lapu-Lapu City nga may 132, Mandaue City nga may 105, Negros Oriental nga may 45, Bohol nga may 16 ug Siquijor nga may ipat ka kaso.

Ang inadlaw nga positivity rate sa Central Visayas anaa sa 17.7 porsyento o 717 sa 4,049 ka mga samples ang positibo. Ang Department of Health (DOH) 7 nitaho nga adunay 597 nga nangaayo ug 28 ang dugang namatay, apan di sa usa lang ka adlaw.

Ang makapaalarma, matod pa ni Cebu City Councilor Joel Garganera, chief implementer sa Cebu City Emergency Operations Center (EOC), ang onse nga namatay sa Cebu City tungod sa Covid-19 gikan sa Hulyo 30 ngadto sa Agusto 2, wa mabakunahi ug upat kanila senior citizens.