SA usa lang ka adlaw, 2,069 ang nangamatay sa coronavirus disease 2019 (Covid-19) sa Agusto 3, 2021 sa Indonesia. Sa nakalabay nga duha ka semana, kaupat pil-a ang gidaghanon sa mga pagpanakod sa Covid.
Busa, nabalaka ang Pilipinas nga ang nahitabo karon sa Indonesia, moigo usab dinhi sa nasod. Sa pagka detect sa Delta variant, naalarma og maayo ang mga health authority.
Tungod sa grabeng pagsaka sa mga kaso sa Covid-19 sa tulo ka mga siyudad, gipailawom ang tri-cities sa modified enhanced community quarantine (MECQ) sulod sa tulo ka mga adlaw. Apan kon tan-awon ang gidaghanon sa mga sakyanan ug mga tawo sa karsada, sama sa naa lang gihapon sa modified general community quarantine (MGCQ) ang tulo ka mga siyudad.
Bitaw, lisod kon higpiton ang pagpatuman sa restrictions kay kon undangon ang mga trabaho, daghan ang mangapasmo kay wa nay ikaabag ang kagamhanan. Nahurot na ang pundo busa wa nay ikagasto sa ayuda. Ang mga negusyante nagbaguod na sab sa ilang mga alkanse. Way negusyo nga wa maapektuhi. Bisan gani ang sektor sa pagkaon naapektuhan. Busa, way negusyante nga mosugot og laing hugna sa lockdown.
Apan duna bayay mahimo ang mga negusyante nga naggamit og teknolohiya. Paagi nga maminusan ang mga tawo nga naa sa karsada, labina niadtong manakay og pampublikong sakyanan.
Kon ang kompaniya naggamit og teknolohiya ug mahimo ra sa ilang mga opisyal ug kawani nga magtrabaho sa balay, gamiton kini. Dako kaayo ni nga kontribusyon sa pagpaminos sa mga tawo nga naa sa dan, bisan kon duna pa silay kaugalingong mga sakyanan.
Kay ang kawani nga motrabaho, bisan kon naa pay kaugalingong sakyanan ang kompaniya, mogawas aron mokaon ug mohigayon sa pagpalit. Kani nga lakang gamay tan-awon, apan dako nag ikatabang sa pagsagang sa Covid-19.