GI-MONITOR na sa kapulisan sa siyudad sa Sugbo ang supply sa medical oxygen human nabantayan nga adunay daghan ang namalit niini sa usa ka tindahan sa dalan B. Rodriguez sa miaging adlaw.
Mga negusyante nga mag-hoard o magtago sa medical oxygen gibaharan sa kapulisan nga dakpon.
Si Police Lieutenant Colonel Wilbert Parilla, deputy city director for operation sa Cebu City Police Office (CCPO), nagkanayon nga gipatawag sa Emergency Operation Center (EOC) ang suppliers sa medical oxygen ug gipasalig nga walay problema sa supply.
“Pero kung dunay mga tawo nga gusto nga mosabotahe nga mag-hoarding or magtago og mga supply sa atong oxygen, kini atong pagaimbestigahan ug kung mamatud-an, appropriate charges will be filed,” matod ni Parilla.
Giangkon sa mga supplier nga adunay pagsaka sa demand sa oxygen tungod man usab kini sa pagsulbong sa kaso sa coronavirus disease 2019 (Covid-19) apan giingong wala kini makaapekto sa supply.
Ang Sugbo ang usa sa mga tinubdan sa supply sa medical oxygen sa Visayas ug Mindanao sanglit naa dinhi ang tighimo niini ug ilang gipasalig nga dili kini mahutdan.
Pasabot ni Parilla nga ang nakita sa social media nga adunay naglumbay nga sakyanan sa gawas sa usa ka tambalanan sa uptown area sa siyudad sa Sugbo diin adunay mga tangke sa oxygen iyaha kini sa pasyente.
Samtang, gimando na ni Cebu Governor Gwendolyn Garcia ang pag-regulate sa pagbaligya og oxygen tanks sa Probinsya sa Sugbo.
Kini subay sa giluwatan nga Executive Order (EO) No. 36 ni Garcia sa Agusto 3, 2021.
Subay sa maong lagda gisaysay nga kon dili i-regulate ang pagpamalit og oxygen tanks, mopadayon ang panic buying sa mga pribadong indibidwal nga mao na unya’y hinungdan nga mahutdan na og supply ang mga labing nagkinahanglan.
“There is a need to immediately regulate the sale by manufacturers and dealers of medical oxygen so that the same may only be sold to hospitals and persons who are in real need,” saysay sa EO.
Apan atol sa gipatawag nga tigum ni Garcia kauban ang mga medical oxygen tank dealers, mipasalig kini nga duna sila’y igong supply alang sa mga ospital.
Sa maong lagda, limitahan ang kapasidad o gidaghanon sa oxygen tanks ang mapalit.
Ang manufacturers ug dealers, mahimong mobaligya og tag 50 kilograms sa medical oxygen tank sa mga ospital.
Alang sa mga pribadong indibidwal nga buot mopalit og supply, mahimo kining makapalit pinaagi sa pagpresentar og doctor’s prescription.
Limitado lang usab og moabot 20 pounds o lima kabuok oxygen tanks matag indibiduwal.
Aron dili malangay ang pagtransport sa medical oxygen tanks, gi-exempt ni Garcia sa truck ban ang tanan nga mga truck nga magdala o maghatod niini sa Probinsya sa Sugbo.
Kahinumdoman nga niadtong Agusto 2, nakitang nag-inilugay ang mga kabanay sa mga pasyenteng naglisod sa pagginhawa sa pagpalit sa mga tangke sa mga oxygen nga gibaligya sa usa ka pharmacy sa dan B. Rodriguez, Dakbayan sa Sugbo tungod kay gusto niining mangandam sa posibleng shortage sa supply.(AYB/ANV)