Joseph Elvir C. Tubilan / Nagsuwat, Hulagway
KARONG panahona nga lisod kaayo ang atong kasinatian resulta ning pandemya nga miigo kanato resulta sa hulga sa coronavirus disease (Covid-19), busa gikinahanglan nga atong iwaling ang atong huna-huna nga maghatag og kahupay ingon man niining naghuot natong dughan gumikan sa mga suliran.
Adunay uban kanato nga kon makadungog og musika ingon sa makalimot sa mga problema.
Sama nalang sa kaskas gikan sa gitara, layo na kaayo og padulngan ang atong imahinasyon nga maluagan ang paminaw.
Sa uban stress reliever kon makapaminaw og musika nga giduyogan og instrument nga ma-relax gikan sa ka-busy sa inadlaw nga gimbuhaton.
Samot na kon pakapinan pa gyod nga adunay mokanta nga bugnawng tingog nga daw manuhotsuhot sa imong emosyon.
GUITARA
Aniay suroyanan nga nindot suwayan nga dili sakit sa bulsa.
Adunay waterfalls sa Lungsod sa Alegria, Lalawigan sa Sugbo nga lahi sa ubang tubod kay ang dagayday niini sa tubig daw sama sa imong madunggan sa gikaskas nga gitara.
“Satisfying” pa ang kabugnaw sa tubig niini nga ang porma sa sapa sama sa usa ka gitara.
Gihinganlan siya og Guitara Falls apan gilitok sa mga tawo sa dapit ang pulong Kitara.
Nahimutang kini sa Barangay Guadalupe, usa ka bukirang barangay sa Alegria nga ang agay-ay sa tubig niini lahos sa sapa ngadto sa Matutinao sa Lungsod sa Badian nga anaa nahimutang ang sikat na kaayo nga Kawasan Falls.
Gawas nga makalingaw alang sa mga mangaligo, limpyo kaayo nga tubig nga gilibutan sa mga punoan nga nakasamot sa kabugnaw sa dapit.
Ang gusto og adventure mamahimong molayat ka sa konkreto nga taytayan nga nilagbas sa sapa nga adunay gihabugon nga 10 ka tiil gikan sa tulay ngadto na sa sapa.
FREE
Good news alang sa mga nagdaginot apan gustong mosuroy apan ang budget di pa-igo, di maguol tungod kay ang Guitara Fall libre sa tanan sa buot maligo.
Apan pahinumdom nga magdala sa inyong kaugalingong pagkaon ug mainom tungod kay way mapalitan sa maong dapit.
Gipahibawo sab nga wa pay mga cottage sa area nga ka-istambayan o room accommodation nga mamahimong ka-istaran kon buot mag-overnight stay.
Hinuon, aduna nay plano ang barangay nga palambuon kini aron ihanyag sa mga turista.
Ang Guitara Falls nalakip kini sa lima ka mga waterfalls nga anaa sa Alegria nga naglangkob sa Cancalanog, Kawa-Kawa, Cambais ug Montpeller.
UNSAON PAG-ADTO?
Acessible ang maong dapit ilabi na niadtong adunay pribadong kasakyan tungod kay lapad ang kalsada apan wa pa hinuon kini makonkreto.
Sa kadtong mga health conscious mamahimong magbiseklita og magbaktas paingon sa maong busay, pakapin na ang paghanggap sa preskong hangin.
Gibana-bana nga kapin sa 15 kilometros gikan sa sentro sa Lungsod sa Alegria ang dapit.
Mamahimong mosakay og habal-habal nga anaa sa 30 ngadto sa 45 minutos nga biyahe.
Sa mga manukad sa dakbayan sa Sugbo sakay og bus gikan sa Cebu South Bus Terminal nga moagi sa Lungsod sa Barili.
Gibana-bana nga ang biyahe molanat sa tulo ngadto sa upat ka oras sa distansiya nga 117 kilometro paingon sa maong lungsod.
Unsa pay gipaabot ninyo libre na, malingaw ka pa.
Tana suroyon ta ang Guitara!