SUPERBALITA CEBU

Paalam sud sa finals!

FINALS: Gilikayan ni Filipino boxer Carlo Paalam (tuo) ang ataki ni Ryomei Tanaka sa host Japan (wa) ning aktuha sa ilang semi-final bout sa men’s boxing flyweight division sa Tokyo Olympics kagahapon, Agusto 5, 2021. Midaog si Paalam ning awaya pinaagi sa unanimous decision nga nagtukmod kaniya sa final round. / AP

MANAGLAHI ang nasinati sa Pinoy boxers nga sila si Carlo Paalam ug Eumir Marcial sa ilang tagsatagsa ka tahas sa boxing semi-finals sa 2020 Tokyo Olympics kagahapon, Agusto 5, 2021 sa Kokugikan Arena sa Japan.

Si Paalam midominar ni Ryomei Tanaka sa host Japan aron iposte ang unanimous decision nga kadaugan nga nagtukmod kaniya sa final round sa men’s flyweight division.

Samtang si Marcial nasugamak sa split decision nga kapildihan batok kang top-seed Oleksandr Khyzhniak sa Ukraine sa middleweight class.

Si Paalam nakaseguro na og silver medal nga puwede pa niyang masaka sa gold medal samtang si Marcial manamilit sa matag upat ka mga tuig nga kompetisyon bawon ang bronze medal.

Pagsugod sa ilang away, si Tanaka miagresibo na dayon apan kanunay siyang masangit sa mga tayming nga counter punches ni Paalam.

Mao gihapon kini ang dagan sa away sa nag-unang duha ka rounds hinungdan nga gipaburan si Paalam sa tanang lima ka judges hangtod ning puntoha.

Sa 3rd round, tataw nga nakuha gihapon ni Paalam ang kadaugan apan ning higayuna, adunay usa sa lima ka judges ang nipabor kang Tanaka.

Sa final round, ikaharong ni Paalam si Galal Yafai sa Great Britain, kinsa milupig ni Saken Bibossinov sa Kazakhstan pinaagi sa split decision sa laing semis nga engkuwentro.

Ang gold medal match nila ni Paalam ug Yafai ipahigayon ugma, Agusto 7, 2021 sa ala 1:00 sa hapon.

Sa iyang bahin, si Marcial nag-una unta sa puntos human sa duha ka rounds apan tataw nga nadominar siya ni Khyzhniak sa 3rd round hinungdan nga nailog sa Ukarainian fighter ang makutas nga kadaugan. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph