Gitabla sa Zamboanga City JPS/MLV ang second phase sa best-of-three semifinals round sa 2021 Chooks-to-Go Pilipinas VisMin Super Cup, Huwebes, Agusto 5 sa Pagadian City Gymnasium.
Kini human nga ang fifth-rank JPS mipabuto og 13-0 nga rally sa fourth quarter aron bawsan ang Petra Cement Roxas, 84-71, sa Game Two nga maoy nakapapugos sa serya ngadto sa tinaktakay nga panag-engkuwentro nga ipahigayon karong alas singko sa hapon, Agusto 6, 2021 adlawng Biyernes.
Ang JPS nga nakalabaw og 18 puntos sa Game One apan napildi kini sa overtime, 84-91, ning higayona mipaniguro nga di na mahitabo pa ang ilang masakit nga kapildihan.
Si Chito Jaime mipabuto og tres sa katapusang 2:14 sa playoff period aron duslitan ang dakong rally sa JPS nga maoy nagtabla, 71-71, human mabiyai og 14 puntos.
“I reminded them about last night’s game, and I emphasized na mag focus and play hard defense. That was killing us eh, ‘yung depensa namin,” matod ni JPS head coach Tony Pardo.
Gihamok og gamayng kainit ang duwa nga gidayandayanan og tulo ka flagrant fouls penalty 1 ug tulo ka technical fouls.
Dihay higayon nga si Jerwin Gaco natagak atubangan ni Jordan Sta. Ana atol sa linayatay. Laing tensiyon mihugpa tali ni Lester Reyes ug Mac Cardona kinsa pulos napahamtangan og technical fouls tunod sa grabing panaglalis sulod sa korte.
Ang 5-10 nga si Fran Yu nangulo sa Zamboanga nga may 16 puntos, walo ka rebounds, tulo ka steals ug duha ka blocks.
Laing 16 gikan usab ni Gabby Espinas, gawas sa pito ka rebounds ug duha ka assists.
Si Leo Najorda, ang nahimong bayani sa Game One, nalimitahan lang ngadto sa nuebe puntos ug nakahimo og upat ka turnovers.
Ang ilang mga puntos:
Zamboanga City (84) – Yu 16, Belencion 16, Espinas 16, Jeruta 11, Gaco 11, Cardona 9, Jumao-as 3, Ferrer 2, Lingganay 0, Neypes 0.
Roxas (71) – Castro 17, Bondoc 16, Najorda 9, Jaime 8, Reyes 6, Sta. Ana 5, Pasia 4, Casino 3, Deles 2, Intic 1, Velasco 0, Elmejrab 0, Templo 0, Camacho 0. Quarterscores: 25-26, 47-37, 63-52, 84-71. (JBM)