GIPASIGARBO ni Gobernador Gwendolyn Garcia nga walay utang o debt free na ang kagamhanan sa Probinsya sa Sugbo.
Kini human nga nabayran na ang moabot sa P74 milyunes nga balanse sa loan niini sa Land Bank of the Philippines (LBP) sa Enero 2021.
Ang maong utang gikan pa sa 2018 sa miaging administrasyon nga gigamit sa pagpamalit og heavy equipment.
“...and more importantly the province of Cebu stands debt free, free of any loan or any financial obligation from any financial institution,” matod ni Garcia atol sa iyang mensahe sa ika-452 nga anibersaryo sa Probinsya sa Sugbo kagahapon, Agusto 6, 2021.
Subay sa report ni Garcia, ang assets sa Probinsya sa Sugbo sa first half sa 2021 anaa sa P211.3 billion, may net income niini sa susamang period anaa sa P1.5 billion ug cash position nga moabot P7.2 billion.
“....So that is why we have taken on the challenge of translating these figures into actual services for the cebuanos,” nagkanayon ang gobernador.
Bisan sa epekto sa pandemya, nagtinguha gihapon si Garcia nga mosaka pa ang kita sa Lalawigan sa Sugbo.
“We expect to double our net income for this year...”matod ni Garcia sa Agusto 6.
Ang naasoy nga pundo, gigahin alang sa imprastraktura, health services, social services, turismo ug uban pang mga serbisyo.
Gipahibalo usab ni Garcia nga adunay moabot sa 246.81 kilometros nga provincial ug barangay roads nga padayong gitrabaho samtang moabot sa 105.11 kilometros na ang nakompleto nga kadalanan sa probinsya.
Subay sa padayon nga pakigbatok sa kagamhanan sa coronavirus disease (Covid-19) ug sa mitumaw nga Delta variant, gidugang sa gobernador nga padayon ang pag-upgrade sa 50-bed levels ngadto na sa di mominos 200 nga bed levels sa provincial hospitals sa Balamban, Bogo City, Carcar City, Danao City ug district hospitals.
Gawas niini, gipahibaw usab ni Garcia nga nag dugang ang probinsya og mga medical ug non-medical personnel diin 1,079 niini ang gi-outsourced, 88 ka medical specialists ug officers ang gipaubos isip job order samtang 35 ka mga specialists ang gipaubos sa Physicians Development Program.
Sa tinguha nga molambo pa ang probinsya, gisubli usab ni Garcia ang padayong pagpatuman sa Sugbusog, Sugbo Negosyo ug pagpalambo sa turismo taliwa ning krisis sa nasud.
Ang ika-452 nga anibersaryo sa Probinsya gisugdan sa hiniusang flag raising sa mga opisyal sa Sugbo, gisundan sa pagtanom sa “Kaningag” giisip nga One Cebu Island tree pagtimaan sa paghiniusa sa mga kadagkoan sa tri-cities ingon man sa Office of the Presidential Assistant for the Visayas (OPAV). (ANV)