MODUNAR og mga baktin ang Central Visayas Pork Producers (Cevippco) sa mga mosunod nga caravan of services sa Kapitolyo aron mahatag ug magamit sa mga benepisyaryso sa bisan unsang programa sa kagamhanan sa lalawigan.
Ang maong lakang isip pagpasamalat sa sakop sa Cevippco sa probinsya ilabi na sa sakong tabang niini sa mga hog raisers bisan paman sa nasinati nga health crisis ug krisis tungod sa African Swine Fever (ASF) outbreak sa nasud.
Sa kasamtangan nagpabilin nga ASF-free ang Sugbo.
Subay sa tinguha sa kapitolyo sa pagpalambo sa food security, nakita usab sa cevippco nga dunay daghang mga pamilya sa mga lungsod ang nadasig sa pag buhi og baboy.
Si Rolando Tambago, pangu sa Cevippco, nagkanayon nga andam sila nga mo suporta sa mga programa sa kapitolyo pinaagi sa paghatag og baktin.
“...Willing ta mo suporta pinaagi sad sa linya sa among negosyo like kanang mga piglets that would definitely benefit sa atong mga constituents sa probinsya, kami as a group we are willing to help kay isip pasalamat nato nga sa kadaghang panahon kada ari nato diri, tabangan ta ni Governor Gwen among industriya mismo then I think panahon na sab nga mo give back ta sa atong mga kababayan sa Kapitolyo pinaagi sa atong Kapitolyo,” matod ni Tambago pinaagi sa Provincial Information Office.
Si Tambago kinsa presidente usab sa Pork Federation of the Philippines nibalik sa Kapitolyo ug nagpasalamat ni Governor Gwendolyn Garcia ilabi na nga gitugotan na niini ang pipila ka pork producers nga makabaligya ngadto sa laing probinsya ilabi na sa Luzon nga gi-ban kaniadto sa gobernador.(ANV)