DAGHAN ang nangaratol pagkakita sa mga hulagway ug video clips nga mikatap sa mga social media sa nagpunsisok nga mga pasyente sulod ug guwa sa mga tambalanan. Gisamutan pa kini sa panic buying nga way klarong tinubdan ug tumo-tumo nga estoryang binuktot.
Gani hangtod karon daghan pa gihapon ang wa magpa-bakuna kay nahadlok sa side effects.
Sa presentasyon mahitungod ining Delta variant nga gipakatap sa inila ug mananaog nga doktor tungod sa iyang pagdumala sa panlawas sa taga Malaysia batok sa Covid-19 nga si Dr. Noor Hisham Abdullah, Sr., consultant surgeon ug Health Director General sa Malaysia, kining bag-ong Covid-19 nga variant sarang paspasa motakod, 15 segundos ra.
Pasabot nga kon dunay 100 ka tawo naa ini, 500 ngadto sa 800 dayon ang daling matakdan sulod sa hamubong panahon.
Kini nga variant pirmirong na diskobrihan sa India unya gipanganlan og B.1.617.2 nga karon naa na sa kapin 100 ka mga nasod sa tibuok kalibutan.
Ang simtomas ini: pin-ot sa ilong o subaw nga sip-on, labad sa ulo nga dugay mawala, panakit sa tutonlan (soar throat), kalibanga, suka, tumang kakapoy sa lawas ug sakit-sakit sa kaunuran.
Aron di kini mosamot og takod, angay magpabakuna, mag sul-ob og mask, magpalayo sa usag-usa (social distancing) sa lugar nga daghang tawo, likayan ang pagpamisita ug suroy. Kon na-expose man ugali sa dunay Covid-19, bisag wa pay simtomas, magpa-test gilayon.
Ang World Health Organization (WHO) mi-ingon nga kining Covid-19 airborne nga virus, pasabot nga magpabilin kini sa hangin bisag ang nagdala ini milakaw o mibiya na. Mas maayong mangabre sa bintana aron maka sulod ug guwa ang hangin.
Ipadayon ang pagkaon og masustansiyang pagkaon, inom og daghang tubig, pahuway ug katulog og insaktong oras, inom og mga bitamina (Bitamina C, D3, Magnesium, ug Zinc) nga pambatok, pag- ehersisyo kada adlaw, kanunay manghugas sa kamot gamit ang sabon unya paninguhaa nga di makahikap sa nawong ug magpuyo sa inyong panimalay.