BISAN niadtong wala pa ang pandemiya, daan na ta nga gipasidan-an nga sa kanunay magmatngon sa atong panglawas. Ang kasagaran nga mga pahimangno mag gikan sa atong mga inahan. Sa kanunay sila nagpasidaan basin sa atong pagpabaya moresulta og di maayo sa atong panglawas.
Kana lang gung moingon sila nga ayaw pagpagutom, di ba moresulta man og kahapdos sa atong kuto kuto. Kanang moingon sila nga ayaw pagpasingulan kay malabdan ka sa ulo, mahilantan, ubhon o sip-unon. Dunay daghan silang gidili nga usahay sa kagahi sa atong ulo, moresulta og dili maayo.
Gihisgutan ko ni kay ning panahona nga nagmangtas og maayo ang Covid-19, angay lang nga ang kagamhanan sa atong mga ginikanan diha sa atong tagsa tagsa ka panimalay mao gyud unta ang mopatigbabaw samtang nakiggubat kita sa makamatay nga virus. Husto ang gisulti sa mga eksperto nga kining gubata dili ni daugon diha sa mga tambalanan, isolation center o binadlungay diha karsada.
Kini nga talagsaon nga giyera sugdan nato og puo diha sa atong mga panimalay, pinaagi sa pagsunod sa mga protocol alang sa atong kaluwasan batok sa virus. Sa ato pa, kon duna tay gitamod nga kamanduan gikan sa atong mga barangay kapitan, susamang kamanduan ang ipatuman sa mga ginikanan sa ilang mga panimalay.
Subo lang palandungon kay daghan sa mga miyembro sa pamilya ang hangtod karon wa pa gyud makonbensir nga tinuod kining dakong hulga sa atong panglawas. Daghan sa mga anak ang padayong naglatagaw, nga mura lang og way nahitabo sa atong palibot. Hinuon nakasabot ta ilabi na niadtong mga frontliner sa mga panimalay nga nangita og panginabuhian aron kasustinihan kining maong gubat.
Duha ka bulan ang nakalabay may naghangyo nako nga matubag ang iyang pangutana labot sa yuta nga igbaligya. Kay may labot man sa puntong legal ang gipangutana unya dinalian pa gyud mao nga akong gipasa ngadto sa usa ka abogado ang maong isyu.
Ang maong abogado nga hinagad kaayo bisan asa mi magkita mao si Atty. Paul Clarence Oaminal.
Usa ra ka tuslok sa akong Messenger, wa magdugay iyang gitubag ang pangutanang legal labot sa yuta nga palitonon. Dakong pasalamat ang namalihug diri kanako kay sa tambag ni Atty. Oaminal sila nagiyahan. Galing lang tungod sa balatian nga asthma, si Atty.
Oaminal, gikuha na sa Labawng Makagagahum. Way magtuo nga mahibulag na siya kanato ning kalibutana. Akong misis nga iyang classmate sa college, hilabihang guola. Kay diay usa siya sa benefeciaries sa pagka matinabangon ni Atty. Oaminal sa nagtungha pa sila.
Kami ni Misis ug tibuok pamilya niduyog sa kasub-anan sa panilya ni Atty.Oaminal.