Bisan unsa ang imong buhaton nga pisikal, way laktaw ang tanan. Kinahanglan nga magsugod sa uno. Dihang nag-gym ko, ang dumbbell nga gipagamit sa akoa, ang five pounds. Dayon nisaka sa 10 ngadto sa 15. Niungot ko sa 20 pounds kay bug-atan pa man ko sa 25.
Bisan sa ubang gamit sa gym ug uban pang exercises nako, wa gideretso sa akong trainor. Anam ang iyang gipabuhat sa akoa kada sets. Pagkahuman ra ba, maora kog gibunalbunalan sa kalawasan.
Bisan sa biseklita, way laktaw. Apan daghan kaayo ang nasayop ani, apil na ko kaniadto. Nakahinumdom pa ko dihang nagsugod ko og bike sa Disyembre 2009 nga ang tumong mao nga makaduaw ko sa lubong ni Heart nga di na ko kinahanglan mosakay og PUJ o habalhabal. Unya naengganyo ko og kuyog kuyog sa akong mga kauban sa Sunstar ug bag-o nakong mga higala. Unya, nibiyahe ko og Carcar City kauban sa among photographer nga si Allan Defensor nianang Abril 2010.
Gatuo kong makasaka na ko og bukid, but sa kaduol sa Guba, nakapahuway ko og ka lima. Ang among biyahe nga makuha lang sa hinay nga tindak og usa ka oras ug tunga, nahimong tulo. Niundang ko og kuyog sa among mga silingan.
Nagpraktis ko sa folding bike nga ang brand Dahon. Buntag ug gabii kong gasikad. Dayon nisuway kog tungas sa Busay sa Willy’s store. Dihang nakaya na nako, nibalik ko sa Guba ug nakuha na nakong way hunong. Mga tulo ka buwan kong nag-anad sa tungas.
ENDURANCE
Kon di ka makatungas pa, ayaw pugsa ang imong lawas. Gikinahanglan ang pag-anad. Mas maayo gani nga mobasa sab ka og mga sinuwat sa mga eksperto kay dako ni og ikatabang sa imong pagsikad.
Ang nakanindot ra ba sa biseklita kay dako ni og tabang sa endurance training. Lahi kaayo og impact ang biking kon endurance na ang hisgutan. Si kanhi boxing world champion Donnie Nietes kanunay magbiseklita. Usa ni sa iyang giingon nga nakatabang niya nga di daling kapuyon kada fight ibabaw sa ring.
Diri sab sa biseklita ko nakakita og mga higalang di plastik, kanang kahibawo mounong nimo. Diri sab ko nakasugat og mga tawo nga mo-guide nimo sa pagsikad.
MANEOBRA
Kon duna ka nay endurance, mas maayong sunod nga praktisan mao ang pagsikad sa lisod nga mga agianan. Kanang single track sa mga kakahuyan. Challenging kaayo ni but mas makalingaw kay sa naandang agianan. But to be frank, katulo ra ko nakabuhat ani kay langay baya ni buhaton bisan gani sa medyo mubo lang nga rota.
Mas makalingaw ni kay mao ni ang mas nindot sa mountain biking. Ma challenge ka bisan kon naa ka sa patag kay usahay daruhan ang imong agian. Dihay una nakong sikad og mga trail, pwerte nakong bantay sa rain ruts, mga bato ug uban pa. Naa gani kabaw nga bantayanan kay manungay.
Kon maanad na ka sa pagmaneobra sa biseklita, diha ka na mas maka appreciate sa kaanindot sa pagsikad. Kapoy apan makalingaw.