So near, and yet so far.
Kini maoy senaryo nga nasinati ni Carlo Paalam human siya masugamak sa split decision nga kapildihan batok sa Great Britain fighter nga si Galal Yafai sa flyweight finals sa Tokyo Olympics, Sabado sa hapon.
Diha na gyud unta sa ganghaan sa iyang pultahan ang gold medal sa boxing nga dugay nang gihandom sa nasod, apan sa kalit lang nahanaw kini sa dihang, sa wala damha, natumba siya sa first round human maigo sa four-punch combo ni Yafai.
Sa pagkatinuod lang, abi nako og dili na makatindog ug di na makasugakod og balik si Paalam kay upat ka solidong kumo mao man gyuy miantimano sa iyang nawong nga, sa samang higayon, naghatod kaniya sa kanbas.
Apan taliwala niini, daw sama sa usa ka samdan nga lion nga mibarog ang kanhi basurero ug bangis nga nakigsinukliay sa iyang mga kinumo batok ni Yafai hangtod mitapos ang unang hugna sa kombati.
Sa ikaduhang round nakapakita og saktong kombati si Paalam hangtod sa third round nga gani dihay higayon nga daw og sa nabangog ang Briton fighter.
Nakabawibawi man tuod si Paalam sa mga puntos sa uwahing duha ka round apan kadtong iyang pagkatumba sa first round maoy lig-ong hinungdan sa iyang tapsing nga kapildihan.
Kapakyasan man tuod ang iyang nadawat sa finals apan ang silver medal nga maoy iyang nalangkat daw og misilak nga susama sa usa ka bulawan nga medalya.
Sa iyang gipakitang kaisog, siya ang tinud-anay nga kampiyon sa yutang Pilipinhon. Usa ka warrior nga dili mahadlok makig-away tungod ug alang sa iyang nasod.
“Ibinigay ko na lang talaga kung ano yung makakaya ko. Kita n’yo naman po na lumalaban talaga ako. Kasi alam ko na ang pusong Pinoy, palaban po,” niya pa.
Sa awarding ceremony, emosyonal nga gitutokan ni Paalam ang medalya nga ingon og sa milugmaw ang iyang mga luha nga daw naghubit sa iyang kinabuhi.
“Itong medal na ito, may simbolo din po ito sa buhay ko. Kasi isa akong mangangalakal, itong medalya ay gawa sa mga sirang gadget po. Sa basura s’ya galing, kaya nai-connect ko po s’ya sa buhay ko,” matod sa lumad nga taga Carmen, Cagayan de Oro.
Tinuod di ikalimod ang mga kapaitan nga naagian ni Carlo sa wala pa siya gipadpad paingon ngadto sa natad sa pamoksing.
Apan luyo ning paglangkat niya sa medalya, nagpahipi usab ang kausaban sa iyang kinabuhi. Mao na unya kini ang mag-aswat kanila gikan sa ilang kalisdanan.
Ang minilyon nga pahalipay nga nagagikan sa gobiyerno ug ubang mga pribadong kompaniya ang magsilbing sukli sa kahago nga iyang namat-an, ug tugbang sa dungog nga iyang natampo ngadto sa nasod. Mabuhi ka Carlo.
Congratulations. You have done something to make us proud.
* * *
By the way, karon diayng adlawa maoy atong ikaduhang pagtak-ang og balik sa atong bag-ong senimanang programa sa Radyo 1 Cebu 90.1 FM nga maghisgot sa natad sa paugnat sa kusog.
Taodtaod na kitang giimbitar sa station manager niini nga si agaw Roel Cabanero apan niadto pang niaging semana nato kini gisanong tungod kay ato pa man gihan-ay ang atong ubang mga committment.
Kini maoy usa sa atong paagi aron mahatagan og kalambuan kadtong mga mahiligon sa natad sa paugnat sa kusog. Magsugod ang maong programa sa alas 10 ang takna sa buntag nga, gawas sa radio, madungog ug makita ra usab nato pinaagi sa live streaming sa FB.
Gawas kang agaw Roel, ikauban usab nato si Kuya Rechel Cabanero.
Ubani kami ninyo ug ipadungog usab ang inyong tagsatagsa ka mga panahom ug komento pinaagi sa comments section sa social media.
Daghang salamat. (jun.migallen22@gmail.com)