Paggamit og plastic gikontrolar

PRODUKTO: Gipakita sa taga Rural Improvement Club atubangan ni Mayor Richard Gomez ang mga eco-friendly nga mga bag o bayong nga ginama gikan sa mga biya nga plastik nga pwede nang gamiton sa pagpangumpra. /LGU sa Ormoc
PRODUKTO: Gipakita sa taga Rural Improvement Club atubangan ni Mayor Richard Gomez ang mga eco-friendly nga mga bag o bayong nga ginama gikan sa mga biya nga plastik nga pwede nang gamiton sa pagpangumpra. /LGU sa Ormoc

ORMOC CITY - Sugdan na pagpatuman sa lokal nga kagamhanan sa dakbayan sa Ormoc pinaagi sa Environment and Natural Resources Department (ENRD) ang pag-regulate sa paggamit og plastic karong Agusto 10, 2021.

Kini ang usa sa mga panaad ni Mayor Richard Gomez sa iyang ikaduha nga termino nga sa 2021 maibanan na ang plastic sa dakbayan.

Giklaro ni City Councilor Lalaine Marcos, chairman sa Committee on Environment sa konseho nga dili ‘total ban’ ang buhaton kondi kontrolahon lang ang paggamit sa ubang plastic.

Matod ni Marcos, ang pagpatuman pinasikad sa City Ordinance No. 52 o ang Ormoc City Single-Use Plastic Products Regulation Ordinance of 2021.

“It is a regulation ordinance, it is not a total ban. Admittedly, gusto gani nako i-ban tanan but dili man pwede kay duna may ubang plastic nga magamit pa nato kay not all plastics man kay single-use,” pasabot ni Marcos.

Matod ni Ingrid Macabare sa Solid Waste Management Division sa ENRO, gidili na sa Ormoc ang paggamit sa mga single-use plastic sama sa mga gagmay ug nipis nga sando bags nga gigamit nga sudlan og isda, karne ug utanon.

“Pero dili tanan sando bag ato gidili, pwede ta mogamit og sando bag pero kanang dagko ug baga sama anang tag 10 or tag 15 kay pwede pa man na nato magamit,” matod ni Macabare.

Gidili na usab sa Ormoc ang paggamit sa plastic nga drinking straw, pangkutaw ug mga nipis nga plastic ug styrofoam nga baso.

Gidili na usab ang paggamit sa styrofoam nga food pack o gamiton sa packed lunch.

Gidili na usab ang plastic nga kutsara, tinidor ug kutsilyo sama sa gigamit kaniadto sa fast food chain.

“Gihangyo lang namo tanan nga magdala nalang gyud og ilang kaugalingon nga kutsara ug tinidor kay dili na pwede sa mga kan-anan ug fast food chain ang plastic nga kutsara ug tinidor,” dugang ni Marcos.

Gidili na sab ang paggamit sa mga nipis nga roll bag. Pwede lang gamiton ang roll bag nga ‘Oxo-Bio’ sa pag-repack og basa nga pagkaon, luto nga pagkaon, asin, asukar, monggos ug uban pa.

“Mailhan na ang Oxo-Bio roll bag kay naa man nay tatak ug naay certification sa plastic,” matod ni Macabare.

Gidili sab ang paggamit sa plastic hand gloves sa mga kustomer nga mokaon sa restaurant ug bisan asang kaonan, pwede lang mogamit niini ang mga nag-andam sa pagkaon.

Ang ice candy ug ice wrapper pwede ra gihapon gamiton sa paghimo og ice ug ice candy ug pwede sab kini gamiton pagputos sa mga lamas.

Gidugang ni Macabare, ang masakpan nga milapas sa balaud dunay multa nga P3,000 ug marebokar ang permit sa establisemento.

Sigon ni Macabare, sagad sa mga basura nga ilang nakolekta sa dakbayan mayoriya niini mga single-use plastic.

Giangkon ni Marcos nga dakong hagit kaniya ang pagpasar sa maong ordinansa ug gipanglantawan nga ‘madugo’ ang implementasyon gumikan kay naigo niini ang kinaiya sa usa ka tawo.

Apan wala igsapayan ni Marcos ang resulta kay buot lang niya nga makatabang nga maibanan ang daghang single-use plastic nga maoy makadaot sa kalikopan.

Kon kaniadto matag Miyerkules ug Sabado lang ang no plastic, apan sugod sa Agusto 10, kada adlaw na.

Sa dihang napasar ang ordinansa, gihatagan sa kagamhanan og unom ka buwan nga lugway ang mga manindahay nga makaandam sa pagpatuman sa balaud.

Gikalipay hinuon sa ENRO nga 50 porsiyento sa mga manindahay ang anam-anam nga nituman sa ordinansa.

Giawhag sa kagamhanan ang mamalitay ug mangumprahay sa pagdala og kaugalingon nga eco bag, basket o bayong. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph