Duha ka adlaw na nga misaka pag-ayo ang kaso sa Covid-19 sa probinsya sa Sugbo, diin unang nitala na og kapin sa 400 ug niadtong Sabado, Agusto 7, maoy labing taas nga natala og 526 ka kaso.
Apan ang hepe sa Cebu Police Provincial Office (CPPO) Police Colonel Engelbert Soriano nagkanayon nga bisan misaka ang kaso sa Covid sa lalawigan, wala pay abiso nga dunay mga lungsod nga mopahigayon og granular lockdown.
Ang gihimo karon sa kapulisan mao ang hugot nga pagpatuman sa executive order (EO) 35-B ni Cebu Governor Gwen Garcia diin ilang giestrikto ang mga bus nga mobiyahe sa kalungsoran.
Matod ni Soriano, sa unang implementasyon sa EO sa probinsya niadtong Sabado, Agusto 7, dul-an sa 300 ang ilang nasusi kon natuman ba ang kamandoan nga walay aircon buses nga namasada og 75 porsiyento lang sa kapasidad ang gitugotan nga pasahero.
Sa dul-an 300 ka bus nga nainspeksiyon, unom ngadto sa pito ang gipakanaog ang mga pasahero tungod kay milapas kini sa kapasidad ug wala na matuman ang minimum health standard.
Pasabot ni Soriano nga kinahanglan nga ang mga pasahero bisan naa sa sulod sa bus nakasul-ob kinig face mask tungod kay mao kini ang kamandoan sa gobernador.
Nakita sa kagamhanan sa lalawigan nga ang tinakdanay sa virus naa sa mga pampublikong sakyanan nga gikan sa Metro Cebu.
Gidugang ni Soriano nga padayon pa ang contact tracing sa matag lokal nga kagamhanan sa probinsya sa Sugbo diin kadtong mga close contact sa mga nagpositibo ug naka-isolate sila.
Awhag ni Soriano sa publiko sa kalungsoran nga likayan lang una ang panagtapok tungod kay nagkasaka pa ang kaso sa Covid. (AYB)