Mahibalik si Jimmy Alapag isip sakop sa coaching staff sa team sa Sacramento Kings alang sa Summer League sa Las Vegas, USA.
Ang kanhi magduduwa sa Philippine Basketball Association (PBA) mosugod sa iyang trabaho karong adlawa, Agusto 9, 2021 (RP time0, asoy sa NBC Sacramento.
Nagtrabaho na si Alapag isip assistant ni coach Bobby Jackson niadtong 2019.
Si Alapag, kinsa nakadesisyon nga hingpit nang mopahiluna sa Amerika, katapusang nagtrabaho isip assistant coach sa San Miguel Beermen sa PBA ug nahimo sab siyang headcoach sa San Miguel Alab Pilipinas sa Asean Basketball League.
Ubos sa kampo sa Kings, si Alapag adunay kahigayunan nga motrabaho kauban si Davion Mitchell, ang ninth overall pick sa 2021 National Basketball Association (NBA) Draft.
Ang Kings mosugod sa ilang kampanya sa Summer League pinaagi sa pagpakigbatok sa Charlotte Hornets ugma, Agusto 10, 2021 (RP time).
Nakaduwa na ang Kings sa California Classic Summer League diin nakatilaw sila og pilde batok sa Los Angeles Lakers, 84-74, ug Golden State Warriors, 89-82, pinaagi sa overtime. (ESL)