Asawa nga nananghid nga mosimba sa simbahan sa Mabolo, dakbayan sa Sugbo kagahapon, Agusto 8, nasakpan sa bana nga nisulod sa usa ka motel kuyog sa iyang kabit sa dalan Sangi, Barangay Tabunok, dakbayan sa Talisay.
Ang bana nga si Gilbert (dili tinuod ngan), 47, maintenance worker sa dakong subdivision, ug taga Lower Barangay Candulawan, dakbayan sa Talisay, nagduda sa lihok sa iyang asawa hinungdan nga gipanid-an ug gisundan kini sa tago.
Naaghat ang bana sa pagpaniid tungod sa katingala nga mosimba bisan dili kini hinimba, wala usab siya agdaha sa pagsimba ug adto pa gyud kini sa layo mosimba.
Uban sa silingan nga nitabang sa bana, nagsakay sila og motorsiklo ug distansiya nga nagsunod sa PUJ nga gisakyan sa asawa.
Nakit-an niya ang iyang asawa nga ninaug sa jeepney dapit sa dakong mall sa Tabunok. Nilakaw kini padulong sa luyo sa mall ug daling nisaka sa motel.
Sumala sa kapulisan, wa makasabot ang bana sa iyang gibati apan nakahunahuna kini sa pagkuha sa iyang marriage contract nga iyang gipakita sa pagdangop sa mga barangay tanod sa Tabunok.
Nangayo dayon ang mga tanod og assistance sa mga pulis sa Discipline Zone Tabunok Outpost alang sa pagronda sa usa ka lawak sa ikatulong andana sa motel nianang alas 10:48 sa buntag kagahapon.
Dihang giablihan ang lawak sa motel, nisugat sa ilang panan-aw ang pulos hubo nga binuhat ug ang babaye maoy nagpatong sa lalake.
Gidakop ang asawa nga si Ana (dili tinuod ngan) nga Job order (JO) employee sa usa ka barangay ug ang kabit nga si Reneldo, 46, dunay kapuyo, construction worker ug taga San Carlos City, Negros Occidental.
Si Police Corporal Eleazar Belciña, imbestigador sa Talisay City Police Station nga nahinabi sa SunStar Superbalita, nagkanayon naaktuhan nila uban sa bana, ang asawa nga nagkabayo sa iyang kabit.
“Hubo ang duha. Nagpatong ang babaye sa kabit. Naghilawas hinungdan nga gipangpusasan,” matod ni Belciña.
Ang bana mibutyag nga dugay na siyang nagduda sa iyang asawa nga nagbinoang sa ilang kaminyuon.
Gibutyag sa bana duna silay tulo ka mga anak, nag-edad sa 17, 16, ug 15 anyos.
“Nasakpan nako siya sauna nga dunay lain sab to nga lalake ka chat-chat niya sa Facebook,” asoy sa bana nga kini ang hinungdan sa ilang kanunay nga panag-away.
Nasayran nga tulo na ka buwan ang ilang relasyon sa asawa ug kabit nga construction worker.
Ang asawa nisulti sa kapulisan nga nahimo niya ang malaw-ay nga buhat human nawad-an na siya og gugma sa iyang bana.
Samtang, ang bana gikatakda nga mopasaka og kasong adultery karon, Agusto 9, batok sa iyang asawa ug kabit.
Gusto sa bana nga matagam ang iyang asawa sa gihimo niini nga pagluib.