Samtang nagkaduol ang bulan sa pag-file sa certificate of candidacy sa mga kandidato sa umaabot nga eleksiyon sa 2022, nag-anam usab kalibog ang utok sa katawhan niining nanggawas nga balita sa gustong mokandidato sa pagka-presidente ug bise presidente.
Unang migawas nga balita nga human sa termino ni PRRD modagan siya sa pagka-bise presidente hangtud nga gisumpay siya sa Duterte-Duterte tandem tungod kay dugay na man nga natunog sa tibuok Pilipinas nga modagan ang atong mayor sa dakbayan sa Davao, Sara Duterte-Carpio.
Aduna akoy nahinumdoman nga dili gyud nako malimtan. Hinapos bulan sa 2018, Disyembre, usa kadto ka furom nga adunay pipila ka sakop sa media. Dunay nangutana kaniya kon matapos ang iyang termino, kinsay iyang nahunahunaan nga mopuli niya.
Nalibkas sa baba sa atong Presidente ang pangalan ni Mayor Sara, kon gusto niya aduna na siya'y katakos nga modagan sa posisyon sa pagka-presidente.
Unya gikan niadto, hinayhinay na nga may mitumaw nga SARA RUN SARA sa 2019.
Akong gitawagan ang akong amigong magsisibya sa Dipolog City nga si Rene Buaya. Gikompirma niya niadtong tuiga, didto ang atong mayor sa Davao sa ilang dakbayan ug nakigkita na sa mga local government units (LGUs) sa probinsiya. Mao usab didto sa siyudad sa Cagayan de Oro ug uban pang mga dakbayan sa Mindanao, Visayas ug Luzon.
Pero gikan niadtong panahona human malibkas sa baba ni PRRD nga si Mayor Sara maoy pakandidatuhon niya sa pagka-presidente, wala na ta makabati niini pag-usab. Puro na balibad niya kon mabati niya nga interesado si Sara nga modagan.
Matud pa niya, "dili, dili puwede! Dili puwede sa mga babaye ang posisyon sa pagka-presidente kay maputos ka sa mga pagtamay ug pagbiay-biay. Maluoy ako sa akong anak".
Niadtong milabay'ng adlaw, girekomenda na sa Partido Demokratiko Pilipino Lakas ng Bayan (PDP-LABAN) ang team GO-DUTERTE. Si Senador Christopher Lawrence Bong GO sa pagka-presidente ug Rodrigo Duterte sa pagka-bise presidente.
Kaniadto tudo balibad si Go nga "dili, dili, wala sa akong bokabularyo ang pagdagan sa pagka-presidente". Pero, kalit nga milubad ug mikambyo siya sa iyang baruganan nga modagan na siya sa pagka-presidente kon si Tatay Digong ang iyang bise presidente.
Unsa man gyud, DUTERTE-DUTERTE o GO-DUTERTE? Pero ayaw na'g libuga nang inyong utok. Mora baya mo'g dili taga Davao? Nahibalo namo sa estilo sa politika ni Tatay Digong. Gituyo na niya para dili mahimong standard bearer si Senador Manny Pacquiao sa PDP-LABAN aron magsanib na ang puwersa sa PDP-LABAN ug HUGPONG NG PAGBABGO. Puwede pa SARA-GO o SARA-BONGBONG, nungka nga DUTERTE-DUTERTE O GO-DUTERTE, naunsa baya mo, karon pa ba ta?
Pakapin lang ni ha? Mitingog na ang atong FM radio station sa Digos City, Davao del Sur. Ang DXAL 90.1 Radio ng Masa Digos City. Sugod karong adlawa, August 9, 2021, alas 7 hangtud alas 8 sa buntag, mabati na pod ninyo ang atong tulumanon sa KONTRA BALANSE sa DXAL 90.1 FM band. Ug mabati pod ninyo sa 88.1 Radio ng Masa Malongon, 88.1 Radio ng Masa Maasim, 88.1 Radio ng Masa Alabel, all in SARANGANI PROVINCE. Salamat.