Nagkape sud sa balay gipatay

PADAYON pang giimbestigahan sa kapulisan ang motibo sa pagpatay sa minero kinsa gipusil sulod sa balay niini samtang nag-inom og kape didto sa Purok Duranta, Barangay Union, Monkayo, Davao de Oro sa alas 9 sa buntag niadtong Agosto 6, 2021.

Ang biktima giila nga mao si Espiridion Capuno Melmida, 47, dunay kapuyo, molupyo sa Block 16, Lot 22, Purok Duranta, Barangay Union sa nahisgutang lungsod.

Base sa insiyal nga imbestigasyon, nasayran nga samtang ang biktima nag-inom og kape sulod sa iyang balay, miabot ang wala mailhing lalaki ug diretsong misulod.

Sa wa masayring rason, gipusil ang biktima sa makadaghang higayon tumong sa nagkadaiyang parte sa lawas nga miresulta sa hinanali niyang kamatayon.

Human sa gihimong pagpamusil, ang suspek nagdaling mikagiw palayo sa wala masayring direksiyon samtang ang biktima gidala ngadto sa Davao De Oro Provincial Hospital sa mga miresponding sakop sa Municipal Risk Reduction and Management Office-Monkayo apan gideklarang dead on arrival.

Narekober gikan sa crime scene ang walo ka mga basiyo sa bala sa kalibre .45 nga pistola.

Dugang pagpanubay ang gilusad sa mga kapulisan sa Monkayo Municipal Police Station aron nga mailhan ug madakpan ang suspek.