Makabungog ang mga abiba sa kalampusan sa mga atletang Pilipino sa Tokyo Olympics. Wala makatarug ang kalibutanong pandemiya sa talagsaong labok nga ilang gipakita nga nagdala og maisugong mensahe nga ang atletang Pinoy dili na mahimong sayunsayonon lang sa mga international nga kompetisyon.
Nagsugod og kabalaka ang mga kaatbang sa dihang nilangkat sa unang Gold medal ang Pilipinas pinaagi kang Hidilyn Diaz. Gisundan kini sa mga medalya nga gihakot mga Pinoy boxer. Bisan ang uban natong atleta nga wala makakuha og medalya, nipakita og talagsaong labok aron sila isipon nga mga gahing competitor sa Olympic.
“Way kabutangan ang akong kalipay sa performance sa atong mga boxer. Namunga na gyud intawon ang sakripisyo sa mga boxer, trainer ug sa mga tawo nga nagpaluyo ning maong matang sa paugnat sa kusog,” malipayong gipaambit diri nako ang mensahe ni Brix Flores, usa ka Sugboanong amateur boxer nga nilangkat og bronze medal atol sa 1986 Asian Games didto sa Seoul, South Korea. Ang iyang kauban nga si Leopoldo Cantancio nakakuha og silver. Ang bugti sa iyang nakuha nga bronze moabot og P10mil isip ganti gikan sa gobyerno.
Matod ni Brix, taga Alang-alang, Mandaue City, human niadto nagpabilin siya sa Philippine Team. Moaway unta siya sa 1988 Olympics apan wala kini mahinayon tungod sa wala damha nga kasikas sud sa Amateur Boxing Association of the Philipines kun ABAP. Si anhing Noy Pacing Flores, amahan ug personal nga trainer ni Brix, maoy responsabli sa maayo niyang labok sa Asian Games. Pagmatuod sa iyang katakus pagbansaybansay og amateur boxers, nakakulit siya og pangalan human nga ang masuong Arlo ug Ronald Chavez, nakadula sa 1992 Olympics.
Si Noy Pacing maoy nagbansaybansay nila ni Arlo ug Ronald ug kini maoy naghawan sa ilang dalan aron mahimong sakop sa Philippine Team. Gawas nilang duha, duna pay daghang amateur ug professional boxers nga ubos sa pagdumala sa legendary Pacing Flores. Si Brix maoy nipuli sa tunob sa iyang amahan ug sa pagka karon duna na sab siyay daghang boksidor nga nagpasilong sa Pacing Flores Boxing Gym diha sa Mandaue City.
Sa hinapos nga bahin sa dekada 80, nakaambit ko og gamay sa pagsikat sa amateur sa boxing dinhi sa ato. Nahimo ko nga announcer sa matag event sama sa sikat kaniadto nga Manila Beer Boxing at the Park. Mao nga sinati kaayo nako ang mga bantugan kaniadto nga mga amateur boxer sama nila ni Edito Ala Villanor, Gerry Peñalosa ug daghan pa. Susamang mga boxer mao na sab ang akong gipailaila ibabaw sa ring sa dihang nakakuha ko og lisensiya sa Games and Amusement Board kun GAB isip professional ring announcer nianang dekada 90.
Sa tinud-anay lang, hilabihan ka memorabli ang akong mga kasinatian uban sa mga boksidor. Dihay mga higayon nga mobiyahe mi padung sa Leyte, Mindanao ug uban bahin sa Sugbo. Diha sab koy biyahe padung sa mga pinuy-anan sa mga boksidor paghimo og feature story sa ilang mga kinabuhi. Akong mensahe kang Edito, gamay nalang kulang makabalik na unta ko sa yutang natawhan sa imong papa sa Takup, San Remegio.
Kutob ra gyud ko sa Bancasan niadtong Biyernes. Gibiyahe man gud nako ning Takup kaniadto kuyog sa akong cameraman Joel Belocura aron makumpleto ang akong special report para sa unang World Championship fight ni Edito batok sa Thailander nga si Voraphin nga maoy IBF champion niadtong dekada 90.