Mapasigarbuhong gipahibawo ni Cebu Gov. Gwendolyn Garcia niadtong Biyernes, Agusto 6, ang ika-452 nga founding anniversary sa lalawigan sa Sugbo, nga wa nay utang ang Kapitolyo.
“The Province of Cebu stands debt free, free of any loan or any financial obligation from any financial institution,” matod niya. Nabayran na, ingon siya, ang balanse nga P74 milyones sa utang sa administrasyon ni kanhi gobernador ug karon Bise Gob. Hilario Davide III sa Land Bank of the Philippines (LBP) sa Enero 2021.
Ang loan sa LBP niadtong 2018 gigamit sa pagpalit og mga heavy equipment. Gawas nga way utang ang Kapitolyo, ang assets niini sa first half sa 2021, anaa sa P211.3 bilyones, net income nga P1.5 bilyones ug cash position nga P7.2 bilyones.
* * *
Unya, pakatulgon lang sa bangko ang kuwarta sa Kapitolyo? Matod sa gobernador, “That is why we have taken on the challenge of translating these figures into actual services for the Cebuanos.”
Naglakip kini sa paghimo og 246.81 ka kilometro nga provincial ug barangay roads, 105.11 ka kilometro niini nahuman na. Ug tungod sa pagsaka sa mga kaso sa Covid-19 ug pagsud sa Delta variant, gipadak-an ang mga 50-bed hospitals sa Kapitolyo ngadto sa 200-bed hospitals.
Dugangan pa gyud og kapin sa usa ka libo nga mga medical ug non-medical personnel ang mga provincial hospital sa Kapitolyo, matod pa sa gobernador.
* * *
Ingon sa mosunod sa siyudad sa Sugbo nga mahimong wa nay utang. Si Cebu City Councilor Raymond Alvin Garcia, chairman sa committee on budget and finance, niingon nga ilang bayran sa hinapos ning buwana ang nahibiling utang sa South Road Properties (SRP) sa LBP.
Si Konsehal Garcia niingon nga ang P1.2 bilyones nga igbabayad sa utang sa SRP gisukip sa P4.5 bilyones nga supplemental budget 1 (SB1) nga gipasar sa konseho niadtong Hulyo 28, 2021.
Ang Y12.315 ka bilyon nga loan sa siyudad niadtong 1995 gikan sa Japan International Cooperation Agency (Jica) nga gipaagi sa LBP isip conduit bank, tugbang kaniadto sa P4.65 bilyones ug pagabayran unta hangtod sa 2025.