MORA'G gidungog sa kahitas-an ang dugay nang damgo ug pag-ampo sa Pilipino nga makabulawan sa Olympics.
Sa katapusan nakasungkit ra gayud ang weightlifter nga si Hidilyn Diaz nga taga-Zamboanga ang pinakaunang gold medal sa Pilipinas didto sa Tokyo, Japan.
Sa unang higayon sa 100 ka tuig, nahimo nang lider ang nasud sa Asia's Olympics nga may pinakadaghang nasungkit nga medalya. Gawas ni Diaz, nakuha sab sa atong boksidora nga si Nesthy Petecio nga taga Davao del Sur ang silver medal.
Nakadaug sab og bronze medal sa middleweight boxing division ang atong kababayan nga si Eumir Marcial nga taga Zamboanga gihapon samtang silver medal usab ang nadaug ni Carlo Paalam nga taga Bukidnon sa flyweight division.
Ang nakapasamot pa sa kalipay kay silang upat taga Mindanao nga kanhi kulelat ug iwit kanunay sa larangan sa paugnat sa kusog. Gikulata'g taman nila ni Petecio, Marcial ug Paalam ang ilang mga kontra mao nga gidayandayanan sila'g medalya sa Olympics nga maoy pinaka-prestihiyusong indigay sa kahanas sa paugnat sa kusog sa kalibutan.
Nahimutang karon ang Pilipinas sa ika-50 nga nasud nga may pinakadaghang nakuha nga medalya kauban ang nasud sa Belgium, Ethiopia ug Uganda.
Naunhan na nato ang Indonesia nga anaa sa ika-55 nga puwesto kauban sa Austria.
Niadtong Agosto 5, nag-una gihapon ang USA nga may 85 medalya ug gisundan sa China, Japan, Great Britain, Australia, Germany, New Zealand, Italy ug France.
Dako na kaayong garbo sa Pilipinas ang naangkon nga kadaugan bisan pa man kon naapektohan kita sa dakong krisis tungod sa pandemya ug sa kagamay sa pundo nga alang sa isports. Wala lang ko kahibalo kung pila ang badyet nga gigahin sa Philippine Sports Commission (PSC) ubos ni Butch Ramirez karong tuiga.
Kung wa ko masayop, resulta na kini sa programa sa PSC nga moabot sa kabanikanhan sa tibuok Pilipinas ang ayuda sa gobyerno sa atong mga atleta.
Sa pagkatinuod, kung mas dako lang ang tabang sa gobyerno sa isports, mas daghan pang Diaz, Petecio, Marcial ug Paalam ang magdala'g garbo sa nasud.
Dili lang tingali sa boksing ug weightlifting ta maayo kon dili sa bisan asang klase sa isports nga wa nagkinahanglan og gitas-on aron modaug.
Dako, halapad ug giliyokan kita og kadagatan apan nganong modaug ang anak sa atong mga mananagat sa swimming?
Daghan tang maayo sa basketball ug volleyball apan nganong pildihon gihapon kita sa ubang nasud?
Hinuon, mahimo kining dugang hagit sa PSC ug sa tanang mahigugmaon sa isports nga mas tutukan pa ang pagpalambo niini sa umaabot.
Nalipay kita nga gawas sa dakong premyo nga ihatag sa gobyerno sa mga atleta nga nagdala'g medalya sa nasud, nihatag usab ang pribadong grupo og tabang sa mga atleta.
Tiaw mong mahatagan sila'g minilyon nga cash, balay, libreng sakay sa eroplano sa tibuok kinabuhi, sakyanan ug uban pa nga makaagni kaayo sa atong mga batan-ong atleta.
Unta sa sunod Olympics o sa Southeast Asian Games man lang, mas modaghan pang batan-ong atleta nga mabulahan sa larangan nga ilang gisudlan. Saludo kami sa tanang atletang Pinoy!