Espinoza: Resulta sa kumpiyansa?

Espinoza: Resulta sa kumpiyansa?

ANG kalit nga pagsaka sa gidaghanon sa mga tawo nga natakdan ug namatay sa coronavirus kon Covid-19 dinhi sa Probinsya sa Sugbo ug sa Dakbayan sa Sugbo ning Agosto katuhoan-dili mao nga di kapugngan nga makapangutana ta sa atong mga lider sa lokal nga kagamhanan, ngano?

Matod sa DOH Central Visayas Covid-19 Case Bulletin No. 416, Aug. 8, ang probinsya dunay 4,447, nga aktibo nga kaso ug 347 ka bag-o nga kaso, samtang ang Dakbayan sa Sugbo dunay 3,640, ug 200 ka bag-o nga kaso. Ang Dakbayan sa Lapu-Lapu dunay 1,537 ug 68 ka bag-o nga kaso samtang ang Dakbayan sa Mandaue dunay 1,449 nga aktibo kaso sa Covid-19 ug 55 ka bag-o nga kaso.

Ang probinsya sa Negros Oriental, nga kaniadto maoy nag-una dinhi sa Region 7 sa daghan nga mga naigo sa Covid-19, karon duna na lang 816, nga kaso. Ato ba sabton nga wa na mohimo og taho ang DOH sa Negros Oriental? Di ba kaha duna silay lakang gibuhat nga maoy hinungdan sa pag-ubos sa ilang kaso nga angay unta atong sundon?

Diin man nipaltos ang Cebu? Tungod ba kay gilugakan sa sa atong kagamhanan ang istrikto nga pagpatuman sa health protocols ug ang mga badlongon migara usab niadtong panahon nga wala pa ta gibalik sa MECQ ug GCQ? Ang pagtugot sa “dine-in” sa mga airconditioned nga restaurant ug ang pagbalik sa mga daan nga PUJ diin magsikit ang pasahero, nga ang uban wa gitarong ug sul-ob ang mask, maoy gidudahan nga usa sa mga hinungdan sa kalit nga pagsaka sa kaso sa Covid-19.

Mao ni usa ka lisod ug sakit nga leksyon alang kanato, lakip na ang mga opisyal sa kagamhanan, nga mokumpiyansa dayon. Niadtong panahon nga giubos ang probinsya ug mga dakbayan sa kategoriya nga MGCQ, ang kadaghanan di na motuman sa husto nga pagsul-ob sa mask, physical distancing, ug paglikay sa tapok-pundok.

Niadtong MGCQ pa ang probinsya ug ang mga dakbayan sa Sugbo, daghang higayon nga makasunod ko og mga sakyanan nga pribado ug de pasaheroan, nga sikit ang mga nanakay ug ang uban walay mask o kon duna man naa ra kutob sa ilang suwang. Mga barkada o pamilya, nga maligo sa dagat nga di na motuman sa health protocols.

Sulod sa mga restaurant ang mga nangaon magsige og tabi samtang nagkaon. Mosamot ang tabi igkahoman og pangaon unya walay mask, ug wala motuman sa physical distancing. Mao ni usa ka rason nga maglikay ko og kaon sa mga restaurant nga airconditioned.

Nakasabot ta sa punto sa kagamhanan ug mga negosyante nga ibalik ang negosyo aron ang mga nagtrabaho makabalik ug mabuhi ang ekonomiya. Ang problema kay ang kadaghanan ug pipila ka opisyal wa na mosunod sa mga health protocol.

Mao ni ang resulta sa kumpiyansa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph