NAHIMUOT ko nga daw naglagot naghunahuna. Krisis na man unta mao nga dali nga giandam ang quarantine center diha sa Cebu City Sports Center.
Apan, nasurpresa ko nga imbes pasudlon dayon ang mga pasyente sa Covid-19, nag-ribbon cutting pa man intawon ang mga opisyal sa Syudad sa Sugbo.
Nag-effort pa gyud para maka-seremonyas. Gigastuhan ug gigahinan og oras.
Murag ordinaryong negusyo o proyekto nga giinagurahan. Daw walay krisis nga gidalian.
Kon ang tuyo mao ang “pogi points” nisumbalik hinuon. Daghan sa mga comments ang nalain.
Kay nganong mag-ribbon cutting pa man?
Di ba mas maka-pogi points man kon ang mga opisyal makit-an nga magkarakara nga sa pagpasulod og mga pasyente? Wa sab gyuy nakatambag?
Show urgency and empathy gud.
Carbon
Daw nagdalidali man karon ang Megawide sa pagtukod sa giingong moderno nga mall sa Carbon.
Kadako ra ba sa maong area. Nagduda lang ko kon iyaha ba gyud sa Syudad sa Sugbo ang tibuok area nga tuyo nga ma-privatize sa Megawide.
Pananglitan, nakahinumdom ko nga kanang yuta dapit sa Maritima kay gi-ilogan sa Syudad sa Sugbo ug sa Cebu Ports Authority (CPA).
Unya panahon sa martial law, nakahinumdom ko nga ang Ermita ubos sa SIR kun Slum Improvement and Relocation.
Dayon kining Warwick giilogan sa Amerkano, Syudad sa Sugbo, ug sa Recoletos sa unang panahon.
Laing impormasyon nga akong nakuha mao nga sa panahon sa mga Katsila, kining Ermita maoy lokasyon sa usa ka hermitage sa mga Recoletos.
Unya, kining maong lugar daghan sab og mga artifacts mao nga di angay hilabtan sa wala pay archeological diggings.
Nakahimo ba kaha ang mga abogado sa Megawide og due diligence? Kadakong labad kon maabot silag korte tungod niini.
Unta, kining joint venture agreement gituki og maayo sa atong mga konsehal nga sakop sa administrasyon. Apan dakong tanghaga nganong niuyon sila dayon bisan pa man og wala makabasa sa tibuok dokumento.
Nakahibawo na man kita nganong mopirma bisan wala makabasa. Pero ato na lang ingnong tanghaga. Unya, lakip sa tanghaga mao ang kakulang sa pagsakop sa mga sipyat sa maong kasabutan.
Alang kanako, dako ang posibilidad nga mayabo ang Megawide ug kining ilang supporter nga mga konsehal. Wa matarong ang pundasyon. (DM nako sa @anol_cebu)