SUGOD karong adlawa, Agusto 11, ipaubos sa modified enhanced community quarantine (MECQ) ang 11 ka mga lokal nga kagamhanan sa Lalawigan sa Sugbo subay sa padayong pagsaka sa kaso sa Covid-19 sa maong mga lugar.
Gilangkuban kini sa walo ka mga lungsod ug tulo ka mga siyudad sa Sugbo.
Mao kiniy nauyonan atol sa tigum sa mga opisyal sa Kapitolyo nga pinangulohan ni Cebu Governor Gwendolyn Garcia.
Base sa listahan nga gipagawas naglangkob kini sa lungsod sa Argao, Consolacion, Cordova, Liloan, Minglanilla, Oslob, Sibonga, Samboan ingon man ang dakbayan sa Carcar, Naga ug Talisay.
Apan sanglit nakita ni San Fernando Mayor Lakambini Reluya ang padayong pagsaka sa mga kaso sa Covid sa ilang lungsod, niboluntaryo kini sa pagpaubos sa maong quarantine classification.
Sa giluwatang kamandoan ni Garcia nga Executive Order no. 38, gidid-an pagbukas ang non-essential establishments.
Kini naglakip sa mga entertainment venues, karaoke bars, sinehan, internet cafes, arcades, sport courts, casinos, outdoor tourist attraction, parlor, beauty salons, lakip usab ang mga lugar alang sa meetings, incentives, conferences ug exhibitions (MICE).
Limitado na usab ang lihok sa mga residente diin ang kadto lang giisip nga “essential” ang gitugotan nga makagawas sa panimalay.
Sama nalang sa mga nagtrabaho, mopalit sa mga gikinahanglan og pagkaon, grocery ug uban pa ug magdala og ID.
ADUNAY BIYAHE
Dili angay mabalaka ang mga nagtrabaho tungod gitugotan gihapon pagbiyahe ang mga sakyanan apan kinahanglan nga mosunod sa minimum health standard, magbutang og air purifiers ilabi na sa mga bus ug ablihan usab ang tanang bintana.
Ang curfew nga ipatuman sa maong mga lungsod magsugod sa 10:00 sa gabii ngadto na sa 5:00 sa buntag.
Gidid-an mogawas ang mga senior citizens nag-edad 65 pataas ug mga batan-on nga nag edad 15 paubos, lakip na ang mga buntis, dunay commorbidities, immunodificient ug uban pang mga sakit. Apan gitugot lang gihapon ang pagpahigayon sa government services ingon man ang relihiyosong kalihukan apan limitado lang sa 10 porsento nga kapasidad.
Gitugot ang pag ehersisyo sama sa swimming, jogging, walking, running o pagbisikleta nga mosunod sa proper physical distancing measures.
TEST RESULT
Aron makapadayon ang panginabuhi sa accredited hotels ug accommodation establishments, gitugotan kining mangabli ubos sa striktong guidelines sa Department of Tourism (DOT).
Subay niini, ang tanan nga mga mobisita sa maong mga establisimento gikinahanglan nga mopakita sa negatibong resulta sa RT-PCR test o ba kaha antigen test.
Pagsiguro nga ma-monitor ang kalungsoran, gimandoan ang kapulisan, sakop sa LTO, HPG, LTFRB, PCG ug ubang force multipliers sa striktong pagpatuman sa maong EO.