GISUGDAN ni Kongresista Paz Radaza sa lone district sa Dakbayan sa Lapu-Lapu ang pag-apod-apod sa Tulong Panghanapbuhay sa Ating Disadvantaged / Displaced Workers (TUPAD) sa beneficiaries sa Dakbayan sa Lapu-Lapu sa Martes, Agusto 10, 2021.
Si Radaza nipahinumdom hinuon sa mga benepisaryo sa pagsunod sa mga health protocol kon mo-claim na sa payout.
Hinuon ang kadto lang hatagan mao ang nakahuman na sa tanang rekisitos nga gipangayo sa Department of Labor and Employment (DOLE). Ang programa iya sa Dole alang sa mga tawo nga nawad-an og trabaho tungod sa pandemic.
“Ako usab ipahibawo sa tanan nga Tupad beneficiaries sa nagka lain-laing barangay sa dakbayan nga kon inyo nang schedule, ayaw kalimot sa pagsul-ob og double mask (one surgical ug one cloth mask) aron kitang tanan ma protehian,” matod ni Radaza.
Gawas sa facemask, kinahanglan usab nga magsul-ob face shield sa dayong sulod sa venue.
Duna say imontar nga thermal scanner ug alcohol sa entrance sa venue ug hugot nga ipatuman ang social distancing.
Gihimakak usab ni Radaza nga di makadawat ang mga wa pay bakuna batok sa Covid-19.
“Dugang pahibalo nga walay kamatuoran ang gipakatap nga estorya nga dili maka withdraw sa pay out sa Tupad kon walay vaccine. Fake news kana! Naglisod na gani ang mga tawo, ato pa gyud lisod-lisoron sa pagkuha sa ilang sweldo,” dugang ni Radaza.
Ang mga benepisaryo niini nga programa nga katambayayong ang Dole nagsilbing tiglimpyo sa ilang mga komunidad sa Dakbayan sa Lapu-Lapu. (REV)