Delos Reyes: Saad nga gituman

MAAYONG adlaw na sab mga Super Suki.

Kumusta ang inyong panginabuhi karong panahon sa pandemya?

Daghan gihapon ang nag-ilaid sa kalisud tungod wala pay klaro ang kanunay nga pag-usab-usab sa atong mga estado sa daghang mga matang sa Q.

Nisugod ta sa ECQ, GCQ, MECQ ug uban pa, samtang ang Covid padayon sab nga nag-usab usab ang variant.

Luyo sa pit-os nga panahon, gihatagan ta og kalipay sa atong mga atleta nga nakigtigi didto sa Tokyo Olympics sa Japan.

Kasagaran sa mga nisungkit og medalya gikan gold ug silver, mga taga Mindanao.

Garbo sa taga Zamboanga nga sila ang unang mihatag og gold medal gikan sa Olympic pinaagi kang Hidilyn Diaz sa weightlifting.

Ang mga boksidor nga mga taga Mindanao midugang og duha ka silver pinaagi kang Nesthy Petecio nga taga Davao del Sur ug kang Carlo Paalam nga taga Cagayan de Oro City. Bronze medal sab ang nasungkit ni Eumir Marcial nga taga Zamboanga.

Ang desi-nuybe ka mga atleta nga gipadala sa nasud sa Tokyo Olympics maoy giilang "Best Performers" kay dili lalim ang makigtigi sa mga hinashasan nga mga atleta gikan sa ubang mga nasud.

Ang kalampusan sa mga atletang Pinoy nagbutang sa atong nasud sa kinatas-an nga ang-ang sa Southeast Asia sa natad sa paugnat sa kusog.

Dili ikalimod nga dako ang papel nga nahatag sa administrasyong Duterte sa pagpataas sa moral sa mga atleta sa husto nga suporta sa ilang pagbansay sa wala pa ang Olympics.

Bulahan ang mga napili nga atleta labi na sa mga misungkit og medalya kay sa ilang pagpauli, sigurado gyud nilang madawat ang mga incentives nga giandam sa gobyerno nga naghimo kanila nga sakop na sa mga milyonaryo sa atong nasud.

Ang gobyerno nag-andam sa kantidad nga mosunod base sa medalya nga nadaug sa Olympics. Ang gold, P10 milyones, silver P5 milyones ug ang bronze P2.5 milyones. Dugang pa sa ilang madawat ang mga pahalipay nga gisaad sa mga pribadong kompaniya.

Ang mga gikasaad sa mga atleta, ila gyud nadawat dili sama sa panahon nga si Mansueto "Onyok" Velasco gisaaran nga hatagan og pahalipay nga cash sa iyang pagdaug og silver medal sa boksing didto sa Atlanta Olympics niadtong 1996 diin siya gisaaran og P500 ka libo ka pesos apan natigulang na lang si Onyok, wala may iyang nadawat.

Ayo na lang kay dili pa ulahi ang tanan kay gipaningkamutan ni Senador Bong Go nga mahatagan siya sa mao nga kantidad kay mihatag siyag dungog sa ating nasud.

Wala na untay labot ang Duterte administration sa mga gikalimtan nga saad apan dili buot ni Senador Go nga magpabilin nga damgo ni Onyok ang kantidad nga P500 ka libo diha sa kapunaw-punawan.

Apan alang sa mga anti-administration, walay bili ang mga nahimo ni Duterte kay bagsak gihapon siya sa ilang pagtan-aw.

Dakong kalipay sa mga atleta nga gituman ang mga nasulat sa balaod nga mga insentibo bugti sa ilang pagpakigbisog alang sa kadungganan sa nasud.

Magpadayon pa unta ang pagtagad sa gobyerno sa mga atleta kinsa man ang sunod nga molingkod diha sa Malacañang. Magpadayon ug unta mas madugangan pa ang atong kalampusan sunod nga mga kompetisyon.

Mabuhay ang mga atletang Pinoy. Mabuhay ang mga atleta gikan sa Mindanao!