KIDAPAWAN CITY -- Tulin pa sa manatad nga mikaratil og dagan ang duha ka rubber tapper human gigukod og King Cobra (Banakon) alas 9:05 sa buntag, Martes, Agosto 10.
Gibutyag ni Jessie Lasia nga pauli na siya, kauban si Manuel Baroka, gikan nanglimpisa sa rubber plantation sa Barangay Manobisa, Magpet, North Cotabato.
Apan ilang nasiplatan ang banakon nga mitabok sa kalsada nga ilang agian.
Sa dihang nakaalinggat ang bitin kanila, gikalitan sila og gukod niini, hinungdan nga mikaratil sila og dagan.
Maayo na lang kay nakakita sila og kahoy ug gitabangan nila og puspos ang bitin, hinungdan nga namatay kini.
Ang King Cobra gikahadlokan sa katawhan sa probinsiya ilabi na ang namuyo sa tiilan sa Mount Apo gumikan daghan na ang napaakan ug namatay tungod sa kalala niini.
Nagpasidaan si Magpet Mayor Florentino Gonzaga sa mga namuyo sa mga hilit nga barangay sa Magpet, ilabi na mga mag-uuma, nga mag-amping sa kaugalingon batok sa mga banakon. (Edgar E. Fuerzas)