SA tuyo nga mas mapadali pa ang pagpamakuna sa mga Oponganon, plano sa kagamhanan sa dakbayan sa Lapu-Lapu nga maghulma ug laing team sa mga health personnel nga mosuroy sa kabarangayan ug mamakuna.
Kini dugang sa pagsuroy sa mobile vaccination clinic nga gipadagan na sa kagamhanan.
Matod ni Atty James Sayson, deputy officer sa vaccination operations center sa Lapu-Lapu, epektibo ang pagpadagan sa mobile vaccination clinic sa kabarangayan.
Ang mobile vaccine clinic makaakomodar og 400 ka mga indibiduwal matag adlaw gumikan sa ka limitado usab sa mga vaccinator niini.
Sa unang adlaw sa pagsuroy niini sa Brgy Pajo nakapamakuna kini ug moabot sa 225 ka indibidwal.
Sa ikaduhang adlaw sa Barangay Bankal, nakapamakuna kini ug 400 kapin ka mga inbidbidwal samtang sa ikatulong pagsuroy niini sa Brgy Pajac nakapamakuna kini ug 328 ka mga indibidwal.
Gikatakdang suroyon sa naasoyng mobile vaccination clinic ang mosunod 7 ka barangay sa dakbayan nga taas ang kaso sa Covid-19.
Awhag ni Sayson ngadto sa mga Oponganon nga maghuwat nga mosuroy ang mobile vaccine clinic sa ilang lugar una sila mopahimulos niini sanglit priority niini ang molupyo sa barangay nga bisitaon.
Unahon usab sa pagbakuna ang mga senior citizen ug persons with disability (PWD).
Gawas sa mobile vaccine clinic, dunay 6 ka vaccination sites aron adunay kapilian ang mga Oponganon nga makapabakuna.
Mao kini ang Hoops Dome sa Brgy Gun-ob, City Auditorium, Island Central Mall, Waterfront Mactan, Mactan Newtown ug Marigondon National High School. (GCM)