HUMAN sa hugtanong pagbalibad kaniadto nga wa siyay interest nga magpapili sa pagka-presidente, karon mipakita na sa iyang interest si Senador Bong Go nga moapil sa presidential elections sunod tuig. Apan sa usa ka kondisyon: si Presidente Duterte ang iyang runningmate. Kini gibutyag mismo ni Senador Go nunot sa pag-endorso kaniya sa kadagkuan sa PDP-Laban isip presidential candidate sa partido. Dia man sab ning mga sipsip sa partido nga appointed officials sa administrasyon sama ni Energy Secretary Alfonso Cusi nga mi-endorso ni Go isip party standard bearer. Kini kuno aron adunay continuity sa mga programa sa Duterte administration nga dili mahuman ni Digong.
Continuity sa ilang mata. Continuity sa mga dili mahuman nga programa ni Digong o continuity sa ilang posisyon? Dili na gustong manghawa ning mga kanahan sa ilang kasamtangang posisyon karon kay nahigam. Kay ang gusto nilang mahitabo, kon modaug silang duha, si Digong gihapon ang magdala sa kagamhanan bisan si Go ang presidente. Kay si Go bata-bata ra gyud ning Digong. O ba kaha mo-resign si Go ug si Digong maoy mamahimong ibalik sa pagka-presidente.
Mao nay gikabalak-an sa uban nga gilikoy lang ni Digong ang Konstitusyon. Kay ang naa sa Konstitusyon nga dili na man makapasubli pagpapili ang Presidente. Apan wala may probisyon nga magdili kaniya nga magpapili sa pagka-bise presidente. Naprobahan na usab nga puwede pang makadagan ang Presidente sa lain nga posisyon sama nilang kanhi Presidente Joseph Estrada ug Gloria Macapagal Arroyo.
Pero si Go, dili na unta kini siya ba magpaulipon ni Digong kay senador na siya. Okey man nang loyalty ba, apan dili pod sa ingon nga himuon na lang kang muchaso o sulugoon kay senador ka na unya naa say imong kaugalingon nga papel nga gidala. Okey lang to sa una nga Special Assistant to the President siya kay mao kadto ang iyang papel nga dakilang alalay. Magka-punga-punga man gani kon i-interpelate sa iyang mga kauban nga senador unya naay mohonghong, unsa na kaha kon presidential debate no? Hinuon, libre man ning magdamgo ba. (bobbygnalzaro@gmail.com)