ORMOC CITY - Niluwat og executive order (EO) 200 si Ormoc City Mayor Richard Gomez bahin sa pagkontrolar sa paglakaw sa mga tawo sa dakbayan, epektibo niadtong Agusto 11, Miyekules, hangtod sa petsa 31, Martes.
Sumala sa EO 200, kinsa kadtong mogawas sa Ormoc nga molapas og pito ka adlaw sa lugar nga iyang adtoan, inig balik, kinahanglang mopresentar bisan asa niini: negative swab result, rapid antigen o saliva test ug QR code sa border control.
Kinahanglan gna 72 hours ang effectivity gikan sa pagpa-test. Adto magpa-test sa lugar nga gigikanan.
Pero kon fully-vaccinated na, libre ra ang pagsulod ug gawas sa Ormoc. Ipakita lang ang vaccination card ug QR code sa border control.
Si City Health Officer Dr. Edmund Keirulf nagkanayon nga makonsiderar nga fully-vaccinated human sa duha ka semana gikan sa pagtupok sa second dose.
Ang moabot sa pier ug airport sa Ormoc, magpakita gihapon og negative swab, rapid antigen o saliva test ug QR code sa una pa monaug sa barko o eroplano.
Pananglitan, kung taga Ormoc moadto og Cebu unya mobalik ra dayon. Magpa-test daan sa Ormoc, 72 hours gihapon ang effectivity busa mobalik sa dili pa mahuman ang 72 hours.
Pero sa fully-vaccinated, libre sa pagsud ug gawas sa Ormoc, vaccination card ug QR code lang gihapon ang ipakita sa pier ug airport control desk.
Ang mga lugar nga walay mohimo og swab, rapid or saliva test sama sa Camotes, pwede ra health certificate ipakita ug QR code. Kinahanglan nga 72 hours ang validity sa health certificate.
Dili pwede magpainom ang mga private-commercial establishment sama sa restaurants.
Pwede ra sila makabaligya pero adto lang sa balay imnon sa kustomer.
Ang mga naninda og ilimnon makahubog, pwede ra gihapon makabaligya pero sa balay ra gihapon imnon.
Way mag-inom sa publikong lugar sama sa plaza, daplin sa karsada, gawas sa balay, park, merkado ug uban pa.
Gidili ang tapuktapok sa panimalay. Kung maghikay, ang pamilya o namuyo sa balay, di mangimbitar sa laing tawo.
Sirado ang tourist destinations nga gidumala sa dakbayan.
Pero kung gipanag-iya sa pribado ang tourist destination, dapat 50 percent lang sa total capacity ilang dawaton.
Ang mga meeting ug conference, 50 percent lang sa total capacity ang gitugot.
Dili pwede ang tapoktapok sa building gawas lang kung ang kagamhanan ang nagpasiugda pero 50 percent lang sab sa total capacity.
Ang mga indoor ug outdoor non-contact sports, 50 percent lang sa total capacity, sama sa zumba ug jogging sa Ormoc Sports Complex. Dili pa pwede ang basketball.
Kini ug daghan pang detalye sa bag-ong EO 200 ni Mayor Gomez. (JKDP)