WALAY natala nga mga dagko nga kadaut sa mga istruktura sa gobyerno sa Davao City human sa 7.1 magnitude nga linog Huwebes sa kaadlawon, Agusto 12, 2021.
Sumala sa Davao City Disaster Risk Reduction and Management Office (CDRRMO), bisan ang mga Covid-19 isolation sites, wala suma pa'y natala nga kadaut ang 7.1 magnitude nga mitay-og sa Davao City ug pipila ka bahin sa Mindanao.
"Katong daan nag previously damaged due to previous earthquakes mao to'y gi-una nato, walay nadungag nga crack," ingon ni CDRRMO chief Alfredo Baloran sa paghinabi kaniya sa Davao City Disaster Radio.
Apan sa Mati City sa Davao Oriental, natala ang mga ginagmay nga mga liki sa mga gambalay ug mga istruktura.
Sa gipahigayon nga inspection sa Office of the Building Official, kauban ang Mati CDRRMO ug City Engineering Office, nakitaan og mga liki ang pipila ka mga opisina sa City Hall compound.
Wala hinuon silay nakita nga major damages diin padayon ang pag-inspeksyon sa team sa ubang opisina ingon man sa mga eskuwelahan.
Kahinumdoman nga gitugaw ang pagkahinanok sa mga tawo dihang mitay-og ang kusog nga linog ala 1:46 sa kaadlawon diin ang epicenter niini anaa sa sidlakan sa Governor Generoso, Davao Oriental.
Base sa bulletin nga gi-issue sa Department of Science and Technology and Philippine Institute of Volcanology and Seismology, nakasinati sa Intensity IV ang Davao City ug ang ubang mga lugar sama sa Kiblawan, Davao Del Sur, City of Koronadal, Tampakan, Tupi, and Polomolok, South Cotabato; Glan, Malapatan, and Kiamba, Sarangani; Monkayo, Davao de Oro.
Intensity V sab ang nabatyagan duol sa epicenter sama sa Governor Generoso, City of Mati, Baganga, and Lupon in Davao Oriental; Tagum City, Panabo, Carmen, ug Nabunturan sa Davao del Norte; General Santos City; Alabel, ug Malungon sa Sarangani Province. (Jeepy P. Compio/Davao CIO/Mati CIO)