DI pa klaro kon kinsa ang kandidato sa Barug pagka-kongresista sa North District. Nag-ilog sa pwesto mao sila si Konsehal Niña Mabatid ug actor Richard Yap. Gipataas na ang kamot ni Mabatid ni Presidential Assistant for the Visayas (Opav) Secretary Mike Dino sa Manila. Ambut og unsay timailhan niadto? Si Yap classmate ni Sec. Dino sa Sacred Heart School ug siya usab ang nagkumbinsir niini nga modagan pagka-kongresista niadtong miaging eleksiyon. Samtang murag salig na kaayo ang habig ni Mabatid nga siya na ang paluyohan ni Dino daghang nagtuo nga dili kini matinuod. Kadaghan makit-i nga magkuyog sila si Dino ug Yap. Kon si Rama na ang gidawat sa Palasyo nga maoy ilang kandidato sa pagka-mayor, wala nay mahimo si Dino. Si Rama na ang dakog tingog sa pagpili og mga kandidato. Tingalig sabakon niya si Yap agig pagrespito sa OPAV chief. Alegre na kaayo sa social media kining duha magsigig kinawrasay. Si Mabatid naghimo nag signature campaign alang sa iyang kandidatura samtang si Yap nagpatawag og miting karong bag-o.
Sa laing bahin, daghan usab ang buot modagan sa maong posisyon sa partido BO-PK. Naa ang kanhi kongresista sa maong distrito, Cutie del Mar, nga mao karon ang nagpadagan sa mga proyekto isip point-person ni Speaker Lord Allan Velasco. Anak siya sa nag-amuma sa maong distrito, anhing kongresista Raul del Mar. Interesado usab ang anak ni kanhi gobernador Lito Osmeña nga si Mimo ug si kanhi konsehal Mary Ann de los Santos. Magdepende kon si kinsa kanila ang ituboy ni kanhi mayor Tomas Osmeña. Wa pa usab masayri kon si kinsa ang ilang kandidato pagka-mayor. Si Osmeña mismo o pilian pa sila si Konsehal Franklyn Ong ug si Kongresista Bebot Abellanosa?
Duna nay mga klarong mokandidato sa pagka-presidente ug bise presidente sa umaabot nga piniliay sa Mayo 2022. Si Senador Ping Lacson ug Senate President Tito Sotto disidido na sa pagdagan. Ang PDP-Laban nga pinangulohan ni Energy Secretary Alfonso Cusi miduso na sa Bong Go – Rodrigo Duterte tandem. Wa pa mokomentaryo kabahin niini ang Presidente. Mahinayon na gyud ang Manny Pacquiao for President Movement (MPPM) kay gitagna na man nga modaug siya sa iyang away sa bag-o niyang kontra nga si Yordenis Ugas. Gipaabot nga ang mahimo niyang bise si Mayor Isko Moreno, kon dili si Senador Grace Poe. Ang kulba-hinam nga gipaabut mao ang announcement ni Davao City Mayor Sara Duterte Carpio. Gisiguro ra ba sa mga political advisers ni Inday Sara nga modagan siya kay siya ang kanunay nga mag-una sa mga survey. Sumala sa impormasyon nga ang iyang kandidato pagka-bise presidente mao si Gilbert “Gibo” Teodoro, Jr., 57, kanhi kalihim sa national defense gikan sa 2007-2009. Siya ang labing batan-on nga nakahupot sa maong posisyon. Usa siya ka bar topnotcher ug Harvard-educated ug nagsilbi isip kongresista sa First District sa Tarlac sa 2009. (mannyrabacal1144@yahoo.com)