Ang pagharos sa best-of-five series ug paglangkat sa unang kampiyonato sa Pilipinas VisMin Super Cup Southern Finals maoy tumong ug tuyo sa Basilan Peace Riders sa dihang ila na usab ikasangka ang KCS Computer Specialists sa Game Three Agusto 13, 2021 sa Pagadian City Gym.
Dala ang 2-0 nga bintaha, ang Peace Riders makigsangka sa Computer Specialists sa Game Three sa alas 6 sa hapon sa Biyernes Agusto 13, 2021.
Sa Game Two niadtong Huwebes, Agusto 12, girehistro sa Peace Riders ang ilang ikaduhang sunosunod nga daog, 96-91.
Hinuon, kini lahi sa nahitabo sa Game One diin saktong dominasyon ang gipakita sa Basilan pinaagi sa palubong sa Mandaue-based Computer Specialists, 94-67.
Gani nakalabaw pa og pipila ka higayon ang KCS una pa kini gilupig sa lahutay sa Peace Riders sa naghinapos nga bahin sa kombati.
Ang panaghugpon nila ni kanhi PBA mainstay Jonathan Uyloan, Chris Bitoon ug Jay Collado aron ipabuto ang 14-5 nga rally maoy nagpabukad sa labaw sa Basilan, 75-65, padong na sa pagsugod sa fourth quarter.
Nakunhoran man tuod sa KCS ang labaw sa dihang mipahagsa ang mga Sugboanon og kaugalingog 10-0 nga rally, 83-81, sa katapusang 5:14 sa duwa, apan kadto ray katapusang hunat nga ilang nahimo sanglit nabawsan man usab kini sa 8-0 run nga nga gihulma nila ni Collado, Michael Mabulac ug Hesed Gabo.
Daog man tuod, apan wa kini makahatag og katagbawan ni Basilan headcoach Jerson Cabiltes.
“It was an ugly win, but a win is a win. ‘Yung KCS they played with character and they showed so much perseverance today,” matod ni Cabiltes sa post-game interview.
Si Rhaffy Octobre kinsa way puntos sa Game One, maoy misilaw alang sa Computer Specialists pinaagi sa iyang 27 puntos, unom ka rebounds ug upat ka assists.
Tagsatagsang nakapugnit og 12 puntos sila si Gileant Delator, Shaq Imperial ug Phil Mercader alang sa Computer Specialists ni coach Mike Reyes, igsuon sa kanhi coach sa Gilas Pilipinas nga si Chot Reyes.
Mga puntos:
Basilan (96) – Uyloan 19, Collado 17, Mabulac 13, Baloria 11, Bitoon 9, Juico 8, Gabo 7, Balucanag 6, Siruma 4, Taganas 2, Manalang 0.
Mandaue (91) – Octobre 27, Delator 12, Imperial 12, Mercader 12, Nalos 6, Roncal 5, Gastador 4, Castro 4, Soliva 3, Sorela 3, Cachuela 3, Bregondo 0. Quarterscores: 15-20, 46-43, 75-65, 96-91. (JBM)