LUYO sa padayong pagsaka sa ihap sa kaso sa Covid-19 sa probinsiya, nanawagan karon si Davao Occidental Governor Claude Bautista nga magtinabangay ang matag miyembro sa Provincial Inter-Agency Task Force (PIATF).
Atol sa gihimong Provincial-IATF Special Action and Crisis Management Committee Meeting on Covid-19 niadtong Miyerkules, Agosto 11, 2021 sa Talyer, Poblacion, Malita sa nahisgutang probinsiya gihangyo ni Bautista nga dungagan pa ang mga pagpaningkamot aron masanta ang pagtaas sa ihap sa Covid-19.
Subay sa gipresenta nga katikaran ni Dr. Anne Margaux B. Quezada, ang PHO officer ug ang incident commander sa PIATF, naay 329 ang total active cases sa probinsiya, 197 niini gikan sa Sta. Maria, 56 sa Malita, 52 sa Jose Abad Santos, 21 sa Sarangani, ug 3 sa Don Marcelino.
Gidugang ni Quezada ang pagpasayod sa mga katikaran ug ang iyang nahimong rekomendasyon aron masanta ang virus.
Nasubo ang gobernador dihang nasayran niini nga anaay 32 ka mga namatay sa virus apan nagpasalamat kini gumikan anaa sab 947 ang mga naka-recover sa 1,308 nga total cases sa Covid-19 sukad pa niadtong Marso 2020.
Tungod niini, nanawagan ang gobernador ngadto sa mga miyembro sa PIATF nga magkahiusa ug magtinabangay diin asa ang matag miyembro dunay usa-usang mga papel aron ma-proteksyonan ang mga residente sa probinsiya. (Jeepy P. Compio)