NAGPABILIN sa ika-31 nga puwesto overall ang Gilas Pilipinas sa labing ulahing gipagawas nga Fiba World Ranking.
Ang Gilas Pilipinas nakatigom og 322.8 accumulated points nga gikuha sa mga kompetisyon nga gituldokan sa 2020 Tokyo Olympic Basketball tournament.
Sa mga nasod sa Asia-Oceania Zone, mas taas og puwesto ang Gilas Pilipinas sa Japan nga anaa sa ika-35 nga dapit.
Ang labing taas og ranking sa Asia-Oceania Zone mao ang Australia nga naa sa ikatulong puwesto.
Ang Iran naa sa ika-22, ang New Zealand naa sa ika-25, ang China naa sa ika-28 samtang ang South Korea naa sa ika-29.
Nagpabiling nag-una mao ang Team USA, nga bag-uhay lang milangkat sa ikaupat nilang sunodsunod nga Olympic gold medal sa Tokyo, Japan.
Ang katapusang kompetisyon nga gisalmutan sa Gilas Pilipinas mao ang Fiba qualifiers diin giharos nila pagdaog ang tulo nila ka mga tahas, duha batok sa South Korea ug usa batok sa Indonesia.
Ningduwa sab ang Gilas Pilipinas sa Fiba Olympic Qualifying Tournament apan pulos kapildihan ang ilang nasinati batok sa Serbia ug Dominican Republic. (ESL)