SA pangedaron nga 52 anyos, daghan pa og mahimo alang sa iyang pamilya ang akong higala nga si Marites Fajardo, ang mapinanggaon nga inahan ni PBA 6th time Most Valuable Player June Mar Fajardo. Niadtong Huwebes sa buntag, naglisod ko pagtuo sa mensahe gikan sa akong manghod nga nagpuyo sa Tajao, Punamungakan, Cebu, nga si Marites gikuha na sa Labawng Makagagahum.
Pipila pa lang ka tuig kami nagkaila ni Marites ug sa iyang bana nga si Bonifacio. Taga Pinamungajan akong mama ug tua sab magpuyo sa Tajao ang usa nako ka manghod. Mao nga usa ka higayon niana, taliwala sa kasibaw sa balita nga si June Mar nasud na gyud sa Philippine Basketball Association (PBA) namasin ko nga maka-interview niya.
Sayop ang akong info kay pag-abot nako sa ilaha sa Sitio Mabini, ang iya rang papa ug mama ang naa sa ilang balay. Ang ilang sulti nga tua sa Manila ug wala pa makapauli sukad nga kini na-draft sa PBA. Abi nako nga nidalikyat pagpauli si June Mar, tungod sa kasayuran nga akong nahipos nga dali ra kaayo ning mingawon sa iyang mama. Gitawag ni siya og mama’s boy.
Gipahimuslan na lang nako ang higayon pag-interview nila ni Bonifacio ug Marites. Sa sige nakong hangyo, nagkasinabot ang magtiayon nga si Marites na lang ang motubag sa akong mga pangutana. Nahisgutan ang panahon sa kabatan-on ni June Mar ug ang iyang pag-eskwela hangtod nga nga may naka-scout niya aron mo-try out sa basketball team sa University of Cebu (UC).
Nagsugod pagsidlak ang bituon ni June Mar sa iyang pagsud isip varsity player. Sayod si June Mar sa ka dako niini og kahulogan alang sa iyang mama ug sa ilang pamilya. Kanang malibre ka sa bayrunon sa college, dili tiaw.
Sa nagpadayon pa ang interview, nasigpatan nako ang dako nga cabinet nga puno sa rubber shoes. Mao nga giwahing namo sa cabinet ang unod sa interview. Asoy ni Marites nako nga ang mga gumang sapatos handumanan ni June Mar sa iyang pagka basketbolista .
Gilaliman sab ka sa tiil ug lapa lapa ni June Mar. Ang ubang sapatos nagtangag og mga habdumanan. Sama sa sapatos sa una niyang dula sa collegiate. Sapatos sa ilang pagka kanpiyon ug daghan.
Ang maong interview nasundan pa sa makadaghan uban sa laing mga reporter dinhi sa ato ug sa taga Manila kay nisikat og maayo si June Mar sa PBA hangtod karon.
Sa opening sa PBA nga maoy labing una ni June Mar nga makigtakos sa mga banggiitan sa maong liga, natawgan nako siya. Matod niya nga dili siya makaako og sud-ong sa iyang anak bisan sa TV nga matumba tungod sa kainit sa dula. Ako siyang gipasabot nga mag-anad-anad kay lahi na ang kumbati sa professional league.
Nakasabot ko sa iyang gibati. Way inahan nga dili bation og kaluya nga magsud-ong sa anak nga mosaliring sa korte.
Salamat kaayo Marites sa pagpaambit sa imong pagmatuto ni June Mar. Pahulay sa dayon, Marites.