SUPERBALITA CEBU

Casimero vs Rigondeaux

KOMBATI: Nagtandiay sa ilang mga lawas sila si si Johnriel Casimero ug Guillermo Rigondeaux atol sa tinimbangay kagahapon sa Carson, California. / Boxingscene.com

Ang pagtuman sa panganti maoy giatngan sa mga Pilipino nga dumadapig sa pagdepensa ni World Boxing Organization (WBO) World Bantamweight champion John Riel Casimero sa iyang titulo karong adlawa batok sa WBA secondary champion Guillermo Rigondeaux sa Dignity Health Sports Complex sa Carson, California, Agusto 15, 2015.

Sa weigh-in kagahapon, si Rigondeaux kinsa mag-41 anyos na sunod buwan, nitimbang og 117.5 pounds samtang nitakdo usab ang 32-anyos nga Casimero sa bantamweight limit nga 118 libras.

Ang duha, sa dihang gipaatubangan alang sa photo opportunity, mahaiton nga nagtinutokay apan mahulagway nga anaa ni Casimero ang dakong kompiyansa sa kadaugan.

Ang lumad nga taga dakbayan sa Ormoc ug kanhi nagbasehan sa Sugbo kinsa naghupot sa 30-4, 21 KOs nga baraha nilangkat sa WBO title pinaagi sa pag-knockout ni Zolani Tete sa England niadtong Nobiyembre 2019.

Iya kining nadepensaan sa niaging Septiyembre human gipayaka niini si Duke Micha sulod lang sa duha ka round.

Batok ni Rigondeaux (20-1), si Casimero nanganti nga iya kining paundangon sa third round ug hingpit nga paretiruhon sa boxing.

Iya man tuod gidayeg ang katakos sa Cuban fighter apan dako ang iyang pagtuo nga impresibong kadaugan ang iyang maangkon ning awaya sanglit mao kini maghatag og agianan nga iyang maaway ang laing duha ka champion sa iyang timbang nga sila si Nonito Donaire Jr. ug Naoya Inoue.

Ang duha gihulagway ni Casimero nga nahadlok nga makig away kaniya. Adunay laing Pinoy ang gipaabot nga mokawat usab og atensiyon sa maong card.

Si Jonas Sultan, ang kanhi pambato sa nasira nga Ala Boxing Gym, ang gikatakda usab nga makigsinukliay sa iyang kumo batok sa mas dako ug taas nga si Sharone Carter (12-4).

Kahinumdoman, si Sultan nipildi ni Casimero sa eliminator fight niadtong 2017 sa Waterfront Hotel Lahug.

Ang kadaugan maoy naghatag og kahigayonan ni Sultan nga moaway batok ni IBF world champion Jerwin Ancajas diin siya gipildi pinaagi sa unanimous decision.

Apan ang ilang panagkontra wala makaputol sa ilang panaghigala ug gani kagahapon nipadala og mensahe si Ancajas ngadto ni Sultan (16-5, 10KOs).

“Ayaw lang gyud og kompiyansa, Nas, sa imong kalaban kay sa lawas pa lang daan kuyaw na kaayo, pero kahibalo mi nga kaya kaayo nimo na,” matod ni Ancajas, ang kasamtangang world champion sa IBF.

“Depensa lang og tarong, ayaw paigo, ayaw siyag sabaysabayi,” dugang ni Ancajas kinsa nisumpay og pangumedya nga naglitson na silang daan para sa selebrasyon niini.

Si Sultan moaway nga taas ang moral tungod sa presensiya sa iyang manager nga si Junie Navarro ug Mike Venezuela, ang team-owner usab sa Zamboanga Valientes basketball team. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph