Samtang galakaw ko kay dunay paliton, nakakita ko og siklista nga gaguyod sa iyang fat bike nga Chinese brand. Wa man sab ma flat ang mga ligid. Diha sa iyang wala nga kamot nagbitbit siya og kadena. Ang chain diay maoy naputol. Kapait ra ba og ang kadena maputol unya wa kay tools.
Sukad ko gabiseklita, kami ug akong mga anak, wa pa mi nakasuway nga naputlan mi og kadena. Kanunay ko nanglimpyo sa among chain ug oiled weekly basta kada adlaw ang gamit. Kanunay sab nako gi-check kon wa bay part sa chain nga niliki na kay padung na maputol.
Ikaduha nga rason nganong wa pa ko kasuway naputlan og kadena mao ang kanunay nga praktis sa shifting. Usa gud sa hinungdan sa pagkaputol sa kadena mao ang kalit kalit nga shifting base sa akong experience uban sa akong mga higala.
Lain sab nga rason mao ang kalidad sa kadena. Yes, mo matter ang kalidad sa kadena. Mas mahal, mas lig-on. Kaniadto, kanang 11 years ago, mopalit ko og kadena sa labing minos P450. Hangtod nga di na ko mopalit og chain nga ubos sa P1,000.
Ambot ang ubang mga tawo mas ganahan og barato unya moreklamo kon bati ang kalidad sa gipalit. I always believe sa ginaingon nga “you get what you pay for.”Ayaw pagpaabot nga kon barato ang imong palit lig-on ni. Kon unsa ang kalidad, mao sab na ang imong gibayran.
GAAN ANG BUG-AT
Sa bisekilta, magkagaan ang frame or parts, magkabug-at ang presyo. Mas mahal, mas lig-on. Gaan ang produkto but bug-at sa bulsa ang presyo.Kon mopalit ka og second hand nga frame or parts, kon gimahalan ka sa baligya sa tag-iya o seller, iya ra sab ning gibase sa kalidad sa iynag gibaligya, labina kon sikat nga brand.
Gawas tingali kon ang tag-iya lumargahay o rich kid nga gusto lang idispatsar ang item, kana maka bargain ka. Usa na sa mga sekreto namo nga hilig og biseklita. Sekreto man, di nako isulti.
Bitaw, naay uban nga gusto i-bargain sa seller ang item nga branded ug slightly used. Hangyo lubo gud. Naay uban mo-grab sab dayon kon barato ra kaayo but later on, diha ra nasayod nga dunay depekto ang gipalit.
Moreklamo nga di diay maayog og kalidad ang iyang napalit.
MADANI
Naay psychology ang biseklita. Kahibawo kag unsa? Kanang mag-ilis-ilis ka og parts o mo-upgrade. Mopagana na nimo og sikad. Mao ni ang sulti sa kadaghanan sa akong mga higala ug nakaila nga hilig og biseklita. Ganahan kang mopakita sa imong upgrade ngadto sa grupo o mga kauban.
Mao diay nang uban nga siklista nga dunay ikagasto, moilis og parts unya mosikad. Bisan ginagmay lang nga upgrade nga makita sa mga kauban. Naa say uban nga mag-ilis-ilis og biseklita kay gipul-an na. Mao na nga nila pa "no permanent" basta biseklita, mailisan gyud.
Wa sab ni magpasabot nga kana ra ang rason nganong ang ubang siklista mosikad. Naa baya gyuy mga tawo nga fitness buff, way laing lingaw, mosikad lang gyud. Maora na sila og mahilantan dayon kon di makasikad.
Apan kinsa bay di ganahan mobiseklita nga nag exercise tuod ka, but nagsuroy suroy sab ka? Daghan kaayo kang makita sa palibot. Daghan kang madiskobrehan, mahimong higala sa biseklita.