Padalhan sa Regional Mobile Force Battalion 7 og dugang 250 ka personnel ang Cebu City Police Office (CCPO) isip augmentation nunot sa pagpatuman sa bag-ong executive order ni Cebu City Acting Mayor Michael Rama.
Matod ni Police Colonel Robert Lingbawan, hepe sa RIMB 7, nga ang 250 ka mga pulis fully vaccinated na.
Apil sila ipakatap sa mga border control points ug mga checkpoint sa kadalanan sa dakbayan.
Hinuon matod ni Lingbawan nga mag agad kini sa plano sa hepe sa CCPO, Colonel Josefino Ligan.
“May coordinated man na plano sa deployment, sa Cebu City. Bahala na yung CCPO kon papaano yung deployment sa augmented personnel natin doon na RMFB,” matod ni Lingbawan.
Gipaniguro hinuon ni Lingbawan nga ang ilang pagpadala sa 250 ka personnel sa dakbayan sa Sugbo dili makaapekto sa ilang trabaho nga mao ang internal security operation sa kabukiran.
Duna pa silay igong pwersa nga mamahimo pa nga mapadala sa Cebu Provincial Police Office (CPPO) kon mohangyo si Police Colonel Engelbert Soriano.
Una nang mipahibawo si Soriano nga wa pa sila magkinahanglan og dugang personnel gikan sa Police Regional Office 7 (PRO) 7 bisan kon nisaad na si Police Brigadier General Ronnie Montejo nga andam na sila nga modugang kon gikinahanglan.
Matod ni Soriano nga makaya ra sa mga pulis sa probinsya sa Sugbo ang pagbutang og mga pulis sa border control.
Gawas sa 250 ka mga police matod ni Lingbawan motabang na usab silag checkpoint sa probinsya sa Sugbo aron mapatuman ang executive order ni Gobernador Gwendolyn Garcia.
Giangkon ni Lingbawan nga aduna silay 15 ka police personnel sa RMFB nga nag positibo sa Covid-19, duha niini police official nga nalandig karon sa tambalanan human makasinatig simtomas sa virus.
Samtang ang 13 naa sa isolation area tungod kay mga asymptomatic ug way gipamati sa lawas gawas sa walay panimhot ug walay lasa sa panahon nga sila mo kaon. (AYB)