SA MILABAYNG 2020, walay mga suliran sa mga sakop sa gabinite sa atong Presidente Rodrigo Roa Duterte. Puro nakatutok sa ilang tagsa-tagsa ka trabaho, gawas lang sa usa ka Francisco Duque, secretary sa Department of Health (DOH).
Maayo tuod nga motrabaho si Duque pero daghang mga isyu batok kaniya sukad pa gyud kaniadto. Daghan nang nanawagan dili lamang sa pipila ka miyembro sa Kongreso, kon dili lakip na ang mga senador nga kon mahimo palagputon na siya ni PRRD.
Apan si Doque bisan kon daghan nang nanawagan nga mag-resign na siya, nagpabilin pa gihapon sa iyang posisyon nga napuno sa kontrobersiyal tungod kay nagsalig kay may dakong utang kabubut-on si Duterte sa iya sa dihang mayor pa sa Davao.
Niadtong milabay'ng Biyernes, nakuratan kita sa makalitong balita nga mi-resign si Atty. Wendel Avisado sa Department of Budget and M anagement (DBM).
Si Avisado suod kaayo nga higala ni Duterte, nagkupot na og daghan kaayong posisyon sa gobyerno.
Panahon sa Cory administrasyon, nahimo siyang regional director sa Department of Interior and Local Government (DILG) sa Davao Region, nahimo siyang City Administrator ni Duterte, ug nahimong duha ka termino nga konsehal sa unang distrito sa atong siyudad sa Davao.
Sa laktud, suod ug sinaligan sa atong mayor, now President Duterte si Avisado, pero nakuratan kita sa iyang kalit nga pag- resign sa DBM tungod kay naatol pa gyud sa pagbulgar sa Commission on Audit (COA) nga dakong anomaliya ang nadiskobrehan sa DOH sa paggasto sa kantidad nga P67.3 bilyon para sa Covid-19 pandemic. Ug sumala sa COA duna pay P11.7 bilyon sa 2020 ang nawala nga sama sa bula nga wala mahibaw-i og asa kini paingon.
Siyempre apektado ang DBM tungod kay gikan sa Department of Finance (DF) ipasa man na ngadto sa maong buhatan kon aduna bay available nga pundo. Ug nahibawo ang tanan nga aduna, kay nag-approved na man ang atong Kongreso sa Bayanihan 1, 2 & 3.
Ang pag-resign ni Avisado duna bay kalabutan sa anomaliya sa DOH? Ang diretsahan nga tubag ana WALA! Ngano man? Tungod kay kon gi-release na ang dakong kantidad gikan sa DBM nga budget ngadto sa DOH wala nay jurisdiction ang DBM ini, kon dili iya na sa DOH.
Tinuod ang statement nga giluwatan ni Avisado nga gumikan sa iyang health mao nga mi-resign siya sa DBM. Dili mahitabo nga magluib si Avisado kang Duterte. Ang dapat manubag niining tanan mao si Duque. Apan ang pangutana, tangtangon na kaha siya niining tungora ni PRRD? Atangi!
***
Para sa mga kaigsuonan nato sa probinsiya sa Davao del Sur, paminawa ang atong bag-ong FM station diha sa Digos City - ang Radyo ng Masa sa DXAL 90.1 MHZ ug ang akong programa KONTRA BALANSE alas 7 ngadto sa alas 8 sa buntag. Mabati pud ta sa 88.1 Malungon, 88.1 Maasim, ug 88.1 Alabel, all in Sarangani Province.
Pagka-alas 8 ngadto sa alas 9, DXOW na, KONTRA BALANSE pa rin.