ONSE ka mga teroristang Bangsamoro Islamic Freedom Fighters (BIFF) ang misurender ngadto sa militar, pangunahan sa ilang kumander, alas 10 sa buntag, Sabado, Agusto 14, 2021.
Mga terorista gipangulohan ni Kumander Mulawin ug napulo ka mga kauban nga sila alyas Rahib, Nasrullah, Salahuddin, Esmail, Rahim, Haron, Tapa, One Eye, Naser ug Kasim nga ilawom sa grupo ni Kumander Ustadz Karialan sa BIFF-Karialan faction.
Misurender ang mga nahisgutang ngadto sa 33rd Infantry Battalion, Philippine Army nga gipangulohan ni Lieutenant Colonel Benjamin Cadiente Jr. ilawom sa Joint Task Force Central sa Barangay Kuloy, Shariff Aguak, Maguindanao Province.
Dala sa mga nahisgutan ang mga tag-as nga matang sa armas nga gilangkuban sa usa ka 60-millimeter Mortar, duha ka caliber .30 Barret rifle, usa ka M14 rifle, duha ka caliber .30 M1 Garand rifle, ug daghan pang uban dala ang mga bala ug magazines.
Gipasalamatan ni Cadiente sila Barangay Kuloy Kapitan Remmy Degay ug si Barangay Tapikan Kapitan Mohamad Dawaling sa pagtabang sa negosasyon sa pagsurender sa grupo ni Kumander Mulawin.
Gidayeg sab ni 6th Infantry (Kampilan) Division Chief ug Joint Task Force Central Commander Major/General Juvymax Uy ang 33rd IB sa malampusong pagbalik sa sabakan sa balaod sa 11 ka BIFF. (Edgar E. Fuerzas)