Nadela: Pagkaon ug medisina siguro-on

Sa kadaghan sa mga gidili panahon sa modified enhanced community quarantine (MECQ), ang pagkaon ug tambal mao gyud ni ang dili maayong matanggong. Salamat, kay sa akong monitoring sa mga dapit nga gipailawom sa MECQ, way bisan usa nga napuwerhisyo sa mga nag-deliver og pagkaon ug tambal. Sama pananglit ni Isabel Rafols nga taga Barangay Sibago, lungsod sa Pinamungajan, Cebu. Si Isabel nanginabuhi pinaagi sa pagbaligya sa iyang mga abot sa uma padung sa merkado sa Poblacion Pardo.

Ang uban niini iyaha sab nga kinumpra. Akong gikumusta ang iyang biyahe. Matod niya, mga buotan kaayo ang mga pulis nga nagdumala sa control point nga iyang naagian. Ingon sab niini ang gitug-an diri nako nila ni Ester Glorion taga Uling, Naga City; Marites Dengli taga Alpacu, Naga City; Milay Selbo taga Alpacu gihapon ug Temy Delima gikan gihapon sa maong dapit.

Pulos nako naadtoan kining mga bukirang barangay nga ilang gigikanan kaniadto. Nakita nako ang kugi sa mga mag-uuma sa maong mga dapit. Ug sa dugay na nga panahon nahimo silang suki sa mga mamalitay sa Pardo sa matag adlawng Sabado ug Dominggo. Mga presko nga utanon ang ilang baligya.

Ilang gitug-an nga lahi sa nahitabo sa unang lockdown sa miaging tuig, nahunong gyud ang ilang paninda. Ug mao sab ning panahona nga nahimong kalbaryo ang pag-adto sa mga merkado tungod kay way biyahe. Mao sab nang panahona nga napugos kog palit sa alugbati sa tag P120 ang kilo. Ang hinungdan kay dili na ta makapa ilin ilin kong asa mopalit. Mapugos nalang og palit bisan mahal.

Nganong mahal? Kay mahal pud ang kumprada sa mga nagnegosyo diha sa mga sitio. Nganong mahal ang kumprada? Kay dunay nagpahimus o mao na gyud to ang presyo tungod sa lockdown? Nilabay naman to pero di gyud malimtan nga kasinatian.

Karon balik ta sa mga produkto sa bukid, base sa akong monitoring, dili gyud angay nga ikabalaka kon supply ang hisgutan. Gawas sa ato, nagbaha sab ang supply sa mga utanon ug lamas gikan sa Cagayan de Oro City. Naay daghang baligya, ang naka apan kay lisod sab ang panguwarta. Way ika palit. Mao nga ang uban naghisgut na sab og ayuda.

Nabanhaw ning isyu sa ayuda kon naa ba tungod sa mga post sa Facebook sa ubang local government units, ilabi na sa kaulohan nga nagpahibalo sa ilang mga molupyo nga may ayudang giandam para nilang tanan. Gisubay nako ning maong inpormasyon, ug duna man gyuy kamatuoran. Ilabi na sa Manila City.

Lisod man ang pagpanagang sa atong LGU ug sa kaulohan, sanglit sa pundo di man gyud sila hibintahaan. Mao nga manampit na sab ta sa nasudnong kagamhanan, nga hatagan og pagtagad kining maong panginahanglan.

Related Stories

No stories found.
SunStar Publishing Inc.
www.sunstar.com.ph