Ang Delta variant sa Covid-19 gikan sa nasod sa India nga nasubay sa awtoridad sa panglawas nga nakasulod na sa nasod. Ang bag-ong daling pagsaka og balik sa kaso sa Covid-19 labina sa dakbayan sa Sugbo, gilambigit sa naasoy nga variant nga mas isog ug mas paspas nga motakboy.
Doble ang giatubang nga risgo sa pandemiya. Dugang frontliners sa panglawas ang gikinahanglan taliwala sa nagnihit nila nga pwersa ug ang nagkaluya nga kusog tungod sa grabeng kahago sa ilang serbisyo sulod na kapin sa duha ka tuig nga pandemiya. Grasya sa Kahitas-an nga namugna na ang daghang bakuna batok sa virus.
Samtang ang kagamhanan nag-apas nga madali sa pagkahuman ang programa sa pagbakuna sa mayoriya sa populasyon aron pagkab-ot sa herd immunity, ang uban nagmakuli ubos sa sayop nga pagtuo nga makadaut ang bakuna ug labaw pa, ang pagkalaylap sa fake news nga nagtutok sa negatibo nga epekto niini.
Ang World Health Organization (WHO) ug Department of Health (DOH) sa nasod mismo niangkon nga dili hingpit nga proteksiyon ang bakuna, dili lang batok sa Covid-19, apan nasuta sa mga pagtuon nga makatabang sa pagbatok sa virus bisan matakboyan sa naasoy nga sakit.
Napamatud-an kini sa kasinatian sa Vicente Sotto Memorial Medical Center (VSMMC) nga mayoriya o 90 percent sa namatay sa Covid-19 sulod sa unang walo ka mga adlaw sa Agusto pulos walay bakuna batok sa virus, sumala ni Dr. Helen Madamba, hepe sa Professional and Allied Health Services sa VSMMC.
Dugang niya nga gikan sa Agusto 1 ngadto sa Agusto 8, 2021, dunay 47 ka pasyente sa Covid-19 ang namatay ug 90 percent kanila o 42 ka pasyente wa pa mabakunahi. Ang ubang pasyente nga namatay dunay laing sakit o comorbidities, masakiton nang daan ang ilang panglawas.
Makita nato sa naasoy nga datus nga ang way bakuna mas risgo labina masakiton nang daan o guwang na labina sa bag-ong variant nga nagkabata ang natakboyan. Magpabakuna na.