SAMTANG nagsangkiig ang nasud tungod sa bag-ong Delta variant sa Covid-19, walay puas nga nitabang usab ang pribadong sektor sa gobyerno.
Bisan ginagmay, aduna kini natabangan sa atong katilingban. Usa niini mao ang Concerned Doctors and Citizens of the Philippines (CDC Ph) nga nagsaulog sa ilang unang anibersaryo karong bulana.
Usa kini ka boluntaryong grupo sa mga doktor ug yanong lumulupyo nga nitabang sa kagamhanan aron mawagtang na ang lockdown ug mobalik na ang naandang panginabuhian sa katawhan. Buot usab sa maong grupo nga hangyuon ang atong mga lideres nga iapil ang barato, luwas ug alternatibong tambal batok sa Covid-19 ug moabot kini sa pinakasuok nga barangay sa nasud.
Kahibalo kita nga adunay tulo ka nag-unang estratehiya ang gobyerno sa pagsumpo sa pandemya, una ang "barriers" sama sa mga lockdowns, pag-distansiya; ang ikaduha ang pagsulod sa hospital sa masakiton; ug ang ikatulo ang pagpabakuna. Nagpahibalo ang CDC Ph nga atol sa ilang unang anibersaryo nga nagpili sila'g mga bag-ong opisyal sa organisasyon sama nila ni Homer Lim, M.D., presidente; Mari Kaimo, bise-presidente; ug Lovely Rivero, sekretaryo.
Matud pa ni Dr. Lim nga usa sa mga epektibong armas batok sa Covid-19 mao ang sakto ug sayantipekong impormasyon kabahin sa maong balatian nga maoy unahon sa pagbuhat sa CDC Ph aron makasalbar sa kinabuhi ug panginabuhian sa mga Pilipino. Iladong mamumulong si Dr. Lim kabahin sa "integrative medicine" ug "cancer treatment" dinhi sa Pilipinas ug sa langyaw'ng nasud. Gawas niini, andam usab sila sa paghatag og tambag sa administrasyon alang sa gitawag nila nga "science-driven, evidence-based solutions" sa mga dagkong hadla karon sa nasud nga dala sa Covid-19.
Gilangkuban ang CDC Ph og mga sakop nga propesyonal ug eksperto sa medisina, panglawas, negusyo, panalapi ug "research industries" sa nasud.
Malipayong gipaila sa CDC Ph ang ilang mga bag-ong opisyal nga andam og tagana sa pagtabang sa nasud sa giatubang niini nga katalagman karon. Sila kadtong may dugay na nga kasinatian ug may lawom nga pagbati sa pagtabang sa mga nagkinahanglan.
Busa saludo kami kaninyo sa CDC Ph ug unta magpadayon kamo nga motabang sa atong kagamhanan ug katawhan sa atong mapait nga kahimtang karon.
Sa laing bahin, gibalita nga nidaghan na ang ihap sa Delta variant gawas sa National Capital Region nga gipailawom karon sa enhanced community quarantine (ECQ).
Dinhi sa Davao, may ubay-ubay na sab nga gibalitang nataptan og Delta variant busa gipahimangnoan kita sa lokal nga kagamhanan nga dugang mag-amping ug magpabakuna.
Gidili na usab ang paggawas sa mga dili "Authorized Persons Outside Residence" (Apor), mga senior citizens ug mga bata. Maayo unta nga makakita na'g bag-ong tambal ang CDC Ph nga barato ra gawas sa bakuna aron tipok gayud ang virus.
Naay gibalitang makatabang daw ang alternatibong tambal sama sa Ivermectin, virgin coconut oil, lagundi ug uban pa. Apil na niini ang pagtuob sama sa giduso ni Cebu Gov. Gwen Garcia. Congrats sa CDC Ph ug good luck sa inyong mga programa alang sa katawhang Pinoy.