KABANTAY mo pila na ka buwan nga wala nay gawas-gawas si Morissette sa ASAP Natin `To?
Di sad ta kaingon nga busy sa preparasyon sa umaabot niyang kasal kay nag-guest judge pa gani siya sa PopPinoy sa TV5.
Unya si Klarisse de Guzman na hinuoy gihulip kang Jaya isip bag-ong hurado sa Tawag ng Tanghalan nga unta si Morissette may mas sikat ug kanunay bida sa mga biritan sa ASAP.
Mas gihatagan pa gani nilag taytul si Morissette isip Asia’s Phoenix kon itandi kang Klarisse.
Unsa diay kahay problema ug nganong wa na kabalik o mobalik ang Cebuana singer sa ASAP?
Yuna, DDS na ba si Morissette? Nganong siya man ang nikanta sa SONA ni Duterte? Hhmm..
ILARA TITS
Nahutdan na ba og extra ang FPJ’s Ang Probinsyano? Nganong nag-doble-doble na man ang karakter sa ilang mga artista?
Nagtuo tingali sila nga dili ra makabantay ang mga nanan-aw. Asa ka di?
Sama pananglit sa doktor nga niatiman ni Presidente Oscar Hidalgo (Rowell Santiago) sa Malakanyang, nganong mao ra man sad ni ilang gipada isip usa sa mga lider sa sindikato nga gika-meeting nilang Lorna Tolentino ug Richard Gutierrez niadtong Huwebes.
Dili gyud pareho ang ilang karakter pero klaro kaayo nga mao rang tawhana. Ang nakalahi lang kay dunay bungot ang lider samtang ang doktor wala. Nausab sad ang antyuhos.
In fairness nagkanindot ang ilang mga episode kay naka-eskapo na ang tinuod nga presidente. Hapit na gyud tingali ni mahuman. Si Julia Montes lagi kunoy pang-finale ani nila karong Oktubre. Tinuod kaha? Maayo ta!
“SAKALAM”
Ang mga sikat nga Cebuano designer nga silang Kenneth Cobonpue ug Cary Santiago diay ang nag-sponsor sa cash prizes sa winners sa “Best Meme Runway Challenge” ni Steffi Aberasturi.
Morag si Steffi ra gyuy sakalam kay tiaw mo na sa tanan siya ra gyuy gipaluyohan ug gitugotan nga makarampa sa Cebu-Cordova Link Expressway bisan og wa pa mahuman. Lakas kaayo!
Dunay article nga nigawas sa national paper nga nihulagway ni Steffi nga DDS.
Apan gikataw-an ra ni sa sister ni Steffi sa iyang Instagram post diin makita sila ni Steff nga naka-bikini sa beach ug dunay caption: “DDS kami! Drop Dead Sexy!”