SUPERBALITA CEBU

Espinoza: Unsay atong padulngan?

Nagpakabana

DAGHAN na ang namatay ug natakdan sa Covid-19 ug sa giingon nga Delta virus, nga mas delikado ug paspas ang takod ning buwan sa Agusto. Niadtong Aug. 14, dunay 1,029 na nga namatay sa Covid-19 sa Dakbayan sa Sugbo ug miabot na sa 3,951 nga aktibo nga kaso samtang dunay 349 ang bag-o nga kaso. Ang Probinsya sa Sugbo miabot na og 4,818 ka aktibo nga kaso sa Covid-19, 558 nga bag-o nga kaso ug 1,186 ang namatay.

Ang Dakbayan sa Mandaue dunay 1,741 ka aktibo nga kaso sa Covid-19, 164 ang bag-o ug 274 na ang namatay. Sa Lapu-Lapu dunay 1,695 ka aktibo nga kaso, 152 ang bag-o ug 245 ang namatay. Tungod niini, giirog sa Agusto 31 ang modified enhance community quarantine (MECQ) sa tulo ka dakbayan samtang nagpabilin sa general community quarantine (GCQ) ang Probinsya gawas sa 11 ka lungsod ug dakbayan sa Naga, Carcar, ug Toledo, nga gibutang sa MECQ.

Diin nasipyat ang Probinsya ug Dakbayan sa Sugbo sa kalit nga pagsaka sa kaso Covid-19? Dinhi sa dakbayan sa Sugbo ang nakita sa Emergency Operations Center (EOC) mao ang wa pagtuman sa mga drayber ug pasahero sa husto nga pagsul-ob sa facemask ug face shield, ug pagdistansya kada tawo. Sa mga restaurant ug bar ang kadaghanan sa mga parokyano ang lihok morag nagtuo nga wala nay Covid-19.

Mao sad ni ang nahitabo sa kalungsoran sa mga miagi nga buwan. Kadaghanan sa akong makit-an di na mosul-ob og facemask ug kon nagsul-ob man naa ra kutob sa suwang ug ang face shield naa ulo. Matag Sabado o Dominggo, puno ang mga kaligoan sa kabaybayonan, nga wala na gituman ang physical distancing.

Kahibudngan ang Negros Oriental, nga maoy nag-una sa listahan sa mas daghan og aktibo nga kaso sa Covid-19 dinhi sa Region 7 sa pagsugod ning 2021, karon mas ubos pa kay sa Probinsya sa Bohol ug Cebu. Kon nahimo sa Negros Oriental ang pagminos sa kaso Covid-19, nganong di man mahimo sa Cebu ug Bohol? Ang mga maayo nga pamaagi sa Negros Oriental sa pagpaminos sa kaso sa Covid-19 angay sundon.

Apan managlahi man gud ang panan-aw sa mga opisyales sa matag dapit. Dinhi sa Cebu, si Gob. Gwen Garcia nakakita og lalis sa mga opisyal sa IATF-DOH tungod sa pamaagi nga ipatuman ni Gobernador Gwen nga sukwahi sa proseso sa IATF-DOH sa mga Filipino, nga gikan sa gawas sa nasud nga mouli ug anha motugdon sa Mactan-Cebu airport.

Dinhi sa dakbayan sa Sugbo, gilugakan ang pagpatuman sa health protocols sama sa physical o social distancing, tarong nga pagsul-og sa facemask ug face shield. Naay daghan mga bata sa dalan nga mangayo og kwarto o pagkaon, nga walay facemask. Kining EO ni Acting Mayor Mike Rama, nga matud pa ipatuman “to the teeth” molungtad ba kaha?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!