NAHIBONG gyud ko niining mga expert nga tigtambag ni Gov. Gwen Garcia. Nganong wa ninyo tambagi ang atong governor kabahin sa bakuna?
Ang panginahanglan karon mao ang bakuna, dili air purifier. Apan way hisgot bisan gamay ang atong governor kabahin sa pagpamakuna ang mga mando karon sa Kapitolyo.
Naglibog ko nga ang gusto unta ni Gov. Garcia mao man nga mapareha ang Sugbo sa Singapore. Dayon didto, sobra sa mayoriya sa populasyon na man ang nabakunahan. Lahi dinhi sa Sugbo kay gamay pa gyud ang nabakunahan. Samot kagamay ang naturokan diha sa Probinsya sa Sugbo.
Layo pa kaayo kita sa giingong herd immunity. Unsaon nga nagsalig man kita sa nagmika nga procurement sa nasudnong kagamhanan. Wa man kita naniguro og atong kaugalingong supply ug makapabakuna kita sa labing daghan sa labing dal inga panahon.
Matod pa ni kanhi defense secretary Gibo Teodoro, mahinungdanon kining pamakuna alang sa atong economic recovery. Labi na gikinahanglan ang malampusong pamakuna kon ang tuyo nato ang pag-abli sa atong mga tourism areas.
Nagkanayon si Teodoro nga mas kumpyansa man gud ang mga turista kon ang mga empleyado ug ang lokal nga populasyon nabakunahan na. Mao kiniy makapadaghan sa atong mga turista.
Subay sa panghunahuna ni Teodoro, angay pahingusgan sa gobernadora ang pagpamakuna dinhi sa Lalawigan.
Nahibudngan nako nganong gipangusgan hinuon sa atong gobernadora kining mga air purifier ug mga checkpoint.
Kon kumbinsido man gyud si Gob. Garcia kabahin sa kaepektibo sa air purifier, unsa kaha kon gamiton ang pundo sa labing adunahan nga lalawigan sa nasud aron makapamalit niini.
Ang gikinahanglan kay ang dokumento nga makapamatuod nga epektibo kini. Pero naay pamahayag ang Department of Health (DOH) nga dili ingon niana ka kasaligan ang air purifier.
Sa iyang broadcast kagahapon sa buntag, gihisgutan ni Leo Lastimosa nga ang baratong face mask moabot og 95 percent ang kaepektibo. Iwit ra kaayo ang air purifier.
Gani, niingon si Leo nga ang air purifier makadaot sa lawas sa naggamit kay kini mohimog ozone, ang ions nga nakakuhag virus mopilit hinuon sa lawas labi na sa nawong.
Ug ang ions moresulta sa pagmugnag formalin. Hunahunaa nga mopilit sa nawong sa naggamit niining air purifier ang formalin, ang chemical nga gamiton sap ag-embalsamar og patay. (DM nako sa @anol_cebu)