NIKABAT ngadto sa 25 ka mga balay ang nangasunog sa Sitio Riverside A, Barangay Subangdaku, Mandaue City.
Lima ang nangaangol sa sunog alas 8 sa buntag sa Lunes, Agusto 16, 2021.
Ang danyos sab sa sunog nikabat ngadto sa P250,000.
Matod ni Fire Chief Inspector Nelson Ababon, hepe sa Mandaue City Fire Office, nga nagsugod ang sunog sa ikaduhang andana sa balay nilang January Lumapas.
Matod niya nga ang balay nilang Lumapas gama lang sa light materials.
Gisusi sa pa sa mga imbestigador sa MCFO ang hinungdan sa sunog, sigon ni Ababon.
Nahinabi sab sa Superbalita Cebu si Lumapas ug sigon niya nga niadtong orasa, anaa siya sa ilang silong nanghumol sa ilang sinina aron labhan.
Siya ra ang nahibilin kuyog ang iyang anak sa ilang balay.
Sigon niya nga nahibulong na siya nga nisiyagit na ilang silingan nga nasunog ang ikaduhang andana sa ilang balay diin nahimutang ang kwarto sa iyang igsuon nga si Annie.
Di pa masuta ni Lumapas kon unsa ang hinungdan nganong nasunog ang kwarto tungod kay wala silay koneksyon sa kuryente ug di sab sila maggamit og kandila.
Matod niya nga ang ilang lutuan butane stove, apan niadtong orasa wala sila nagluto ug anaa lang usab sa ilang silong.
Sa laing bahin, niingon si Ababon wala ra sila maglisod sa ilang pagresponde sa lugar kay bisan sudlonon, nitugot ang ubang mga establisemento nga makasulod sila aron mas mapaduol sila sa fire scene.
Tungod niini napalibotan na nila ang fire scene hinungdan nga wa nakalabang ang kayo, sigon ni Ababon.
Matod sa report sa MCFO nga gisaka ngadto sa first alarm ang sunog alas 8:02 sa buntag ug gideklara sab nga second alarm alas 8:09 ug third alarm sa alas 8:14
Matod ni Ababon nga nakontrolar na nila ang sunog alas 8:39 ug hingpit nga napawong alas 9:07 sa buntag.
Gi-evacuate ang mga nasunogan sa Subangdaku Elementary School.
Nagsugod na og panglista sa mga nasunogan ang City Social Welfare and Services sa mga nasunogan aron mahatagan sila og hot meals sulod sa tulo ka adlaw ug relief goods. (KFD)